| e-texts navigator |
| Wylie |
53b1 བྱེད།། འཁོར་བ་རྒྱ་མཚོ་ཐུགས་རྗེའི་གྲུ་ཡིས་སྒྲོལ།། བདེ་བར་གཤེགས་པ་ཀུན་གྱི་ཐུགས་ཀྱི་མཆོག། ཡེ་ཤེས་མཆོག་ལྡན་དོན་གྱི་སྙིང་པོ་འདི།། རྣལ་འབྱོར་སེམས་ཀྱི་དོན་ཆེན་ནི།། འཁོར་རྣམས་འདུས་པ་རྣམས་ལ
53b2 རྒྱ་ཆེར་བཤད་དུ་གསོལ།། དོན་རྣམས་ཤིན་ཏུ་རྟོགས་པ་འཚལ་ལགས་ན།། ཐུགས་རྗེའི་བྱིན་རླབས་ཆོ་འཕྲུལ་བཤད་དུ་གསོལ།། ཨ་ལ་ལ་ཧོ་ཞེས་གསོལ་ཏོ།། དེ་ནས་བཅོམ་ལྡན་འདས་ཡེ་ཤེས་ཐམས་ཅད་ཀྱི
53b3 བདག་པོ་དེས། འཁོར་རྣམས་ཀྱིས་གསོལ་བ་བཏབ་པར་གཟིགས་ནས། བཞད་པ་མཛད་དོ།། བཞད་པ་མཛད་པས། ཐུགས་རྣམ་པར་དག་པའི་ཀློང་ནས། རིག་པའི་ཡེ་ཤེས་བརྗོད་ཀྱི་མི་ལངས་པའི་ཡང་མི་ལངས
53b4 པ་འོད་ཟེར་དང་བཅས་པ། འོད་ཟེར་དེས་ནམ་མཁའ་ཁྱབ་པར་མཛད་དོ།། འོད་ཟེར་དེ་དག་རེ་རེ་ལས་སྤྲུལ་པའི་སྐུ་བསམ་གྱི་མི་ཁྱབ་པར་ཤར་བར་མཛད་དོ།། སྤྲུལ་པའི་སྐུ་དེ་དག་རེ་རེ་ལས་ཀྱང་སངས་རྒྱས
53b5 འབུམ་ཕྲག་འཁོར་སོ་སོ་ཞམ་འབྲིང་དང་བཅས་པ་གནས་པར་མཛད་དོ།། དེ་དག་ལས་ཡེ་ཤེས་ཀྱི་ཆར་མངོན་པར་དབབ་པས།། མ་རིག་པའི་ཀློང་ཐམས་ཅད་གསལ་བར་མཛད་དོ།། རིག་པའི་ཆོས་ཀྱི་སྒྲ་སྣ་ཚོགས
53b6 དང་། རིག་པའི་མཆོད་པ་སྣ་ཚོགས་བྱུང་སྟེ། ཀུན་ཏུ་ཁྱབ་ནས་བྱུང་ངོ་།། སྐུ་གསུང་ཐུགས་གར་མཁན་ལྟར་ལང་ལོང་ཕྱེད་པར་བྱུང་སྟེ་རྨད་དུ་བྱུང་ངོ་།། ཨ་ལ་ལ་ཧོ་ཞེས་སྒྲ་བསྒྲགས་པས།། སངས་རྒྱས་རྣམས་ཀྱང
iiif viewer powered by OpenSeadragon
