| e-texts navigator |
| Wylie |
39b1 ཚོགས་རྣམས་ཀྱིས་འདི་སྐད་ཅེས་རྣམ་པར་བསྐུལ་ལོ།། སེམས་དཔའ་ཆེན་པོ་ཁྱོད་ནི་བཅོམ་ལྡན་འདས་གསང་བ་མཆོག་གི་བདག་པོས་ཀྱང་སྡུད་པ་པོ་རྡོ་རྗེ་ཆོས་སུ་མིང་བཏགས་ཤིང་དབང་བསྐུར་བས་ན། ད་ཁྱོད
39b2 ཀྱིས་ཕྱི་རབས་པའི་རྣལ་འབྱོར་གྱི་དོན་ཕྱིར། ཐེ་ཚོམ་དང་སོམ་ཉི་རུ་གྱུར་པ་རྣམས་དྲིས་ཤིག་ཅེས་རྣམ་པར་བསྐུལ་ལོ།། དེ་ནས་བྱེད་པ་པོ་ཡིད་ཀུན་ཏུ་བཟང་པོས་བསྐུལ་བར་རིག་ནས་འདུས་པའི་འཁོར་ཚོགས་ལ
39b3 ལེགས་སོ་ལེགས་སོ་ཞེས་བྱ་བ་བྱིན་ཏེ། རྡོ་རྗེ་ཡིད་ཀུན་ཏུ་བཟང་པོ་ལ་སྩོགས་པ་འདུས་པའི་འཁོར་ཚོགས་རྣམས་ཀྱིས། བཅོམ་ལྡན་འདས་གསང་བ་མཆོག་གི་བདག་པོ་ལ་རྨད་དུ་བྱུང་བའི་མཆོད་པས་མཆོད་སྟེ།།
39b4 ལན་བརྒྱ་ཕྲག་སྟོང་དུ་སྐོར་བ་བྱས་ཤིང་བརྐྱང་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་བ་བཏབ་པོ།། ཨེ་མའོ་བདེར་གཤེགས་བཅོམ་ལྡན་འདས།། རྡོ་རྗེ་བླ་མེད་ཐེག་མཆོག་གི། བློ་ལ་སྣང་བའི་ཐེ
39b5 ཚོམ་རྣམས།། བདག་ཅག་འཁོར་ཚོགས་ཞུ་བར་འཚལ།། ཞེས་གསོལ་པས། གསང་བ་མཆོག་གི་བདག་པོས་བཀའ་སྩལ་པ། སེམས་དཔའ་ཆེན་པོ་ལེགས་ཀྱིས་ཅི་དང་ཅི་འདོད་པ་དྲིས་ཤིག་དང་། གནང་བའི་སྐབས
39b6 དབྱེ་བར་བྱའོ།། དེ་ནས་རྡོ་རྗེ་ཡིད་ཀུན་ཏུ་བཟང་པོ་ལ་སྩོགས་པ་འདུས་པའི་འཁོར་རྣམས་ཀྱིས་མགྲིན་གཅིག་ཏུ་ཨ་ལ་ལ་ཞེས་པའི་སྒྲ་ཕྱུང་སྟེ། རང་རང་གི་བསམ་པ་གནས་སུ་བསྡུས་སོ།། དེ་ནས་རྡོ་རྗེ་ཡིད་ཀུན་ཏུ
iiif viewer powered by OpenSeadragon
