| e-texts navigator |
| Wylie |
26b1 དོ།། དེ་ནས་མ་མོ་དེ་དག་ཕཊ་ཞེས་པས་རང་རང་གི་གནས་ག་ལ་བ་དེར་ཡུད་ཙམ་གྱིས་ཕྱིན་པར་བཀྱེའོ།། དེ་ནས་ཁྲོ་བོ་རྣམས་ཕྱག་བྲང་ལ་བསྣོལ་ཏེ་བཙིར་བས། མི་གཙང་བའི་རྒྱ་མཚོ་འཁྱིལ་ཏེ་དྲན་པ་མེད་པ
26b2 ལས། ཁྲག་འཐུང་ཆེན་པོས་ཐུགས་རྗེའི་བདུད་རྩི་འབྱུང་བའི་ཏིང་ངེ་འཛིན་ལ་སྙོམས་པར་བཞུགས་ནས། སྦྱོར་མཚམས་ནས་ཁྲོ་མོ་རྡོ་རྗེ་དམེ་བ་བརྩེགས་མ་འཐོན་ཏེ། མི་གཙང་བའི་རྒྱ་མཚོ་བརྔུབས་པས་སླར་དྲན
26b3 པ་ཐོབ་སྟེ། བདེན་པ་མཐོང་ནས་དཔལ་ཆེན་པོའི་འབངས་སུ་མནས་བོར་ཏེ། ལུས་ཁྲོ་བོ་རྣམས་ཀྱི་གདན་ཁྲིར་ཕུལ་ཏེ། གྲུབ་པ་ལང་ཀར་ཁས་འཆེས་ནས་ཕྱི་རབས་པའི་རྣལ་འབྱོར་གྱི་ཚོགས་སྐྱོང་བར་དམ་བཅས
26b4 སོ།། དེའི་ཚེ་ཕྱོགས་སྐྱོང་རྣམས་ཞབས་འོག་ཏུ་བཞག་གོ། མ་དང་བུ་མོ་དང་ཆུང་མ་རྣམས་ཀྱང་དཔལ་གྱི་འཁོར་དུ་ཕུལ་ཏེ་དམ་ཚིག་བྱིན་ནས་གཞལ་ཡས་ཁང་གི་མུ་རན་ལ་བཞག་གོ། རྒྱུད་ཀྱི་རྒྱལ་པོ་དེ་བཞིན
26b5 གཤེགས་པ་ཐམས་ཅད་ཀྱི་གསང་བ་དུར་ཁྲོད་ཁུ་བྱུག་རོལ་པའི་མདོ་ལས། དྲེགས་པ་ཅན་བཏུལ་བའི་ལེའུ་སྟེ་བདུན་པའོ།། །། དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས། ཉིད་ཀྱི་དཀྱིལ
26b6 འཁོར་འདི་དག་ཐུགས་ཀ་ནས་ཕྱུང་ངོ་།། དུར་ཁྲོད་དང་ནི་ངམ་གྲོག་གནས།། རྐང་གཅིག་སུམ་མདོ་ཁང་སྟོང་དུ།། རྡོ་རྗེ་དྲག་པོའི་དཀྱིལ་འཁོར་བྱ།། འབར་བའི་འཁོར་ལོ་རྩིབས་བརྒྱད་པ།། གྲུ་ཆད་བཞིས་ནི་རབ
iiif viewer powered by OpenSeadragon
