| e-texts navigator |
| Wylie |
23a1 རང་གི་ཐུགས་ཀར་བསྡུས་ཏེ། གཉིས་སུ་མེད་པའི་དབྱིངས་སུ་མི་སྣང་བར་མཛད་དོ།། གནས་ཀྱི་དཀྱིལ་འཁོར་ལ་སྩོགས་པ་ཐམས་ཅད་ཀྱང་ཉིད་ཀྱི་སྐུ་ལ་བསྡུས་ཏེ་མི་སྣང་བར་མཛད་དོ།། དེ་ནས་ཧཱུཾ
23a2 བཛྲ་ཀྲོ་དྷ་མ་ཧཱ་རཱ་ཛ་ཕཊ། ཅེས་པའི་སྒྲ་བརྗོད་ཅིང་རྡོ་རྗེ་ཁྲོ་བོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁྲོས་པའི་སྐུ་མངོན་པར་འདུ་མཛད་དེ། དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་མཐའ་ཡས
23a3 པར་སྣང་བའི་ཐུགས་ཀ་ནས་རིག་པའི་བྷྲཱུཾ་སྨུག་ནག་ལས། རླུང་ནག་རྡོ་རྗེའི་དཀྱིལ་འཁོར་ལ་བརྟེན་པའི་ཁྲག་གི་རྒྱ་མཚོ་འཁྲུགས་པའི་དཀྱིལ་ན། ཀེང་རུས་ཆེན་པོའི་རི་རབ་འབར་བའི་སྟེང་ན། དྲག་པོ་ཨེའི་གཞལ
23a4 ཡས་ཁང་ནམ་མཁའི་རྒྱ་དང་མཉམ་པ། འབར་བའི་འཕྲོ་བ་འཁྲུགས་པའི་ཀློང་དུ་འཁྱིལ་བར་འགྱུར་རོ།། དེ་ནས་བཛྲ་མ་ཧཱ་ཀྲོ་དྷི་ཞེས་བརྗོད་པས་དེ་བཞིན་ཉིད་ཀྱི་དབྱིངས་ལས་ཁྲོ་མོ་དབང་ཕྱུག་མངོན་པར་ཕྱུང་སྟེ།
23a5 གཉིས་སུ་མེད་པའི་བྱང་ཆུབ་སེམས་ལས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛ་ལ་མཎྜལ་ཕཊ་ཕཊ་ཕཊ། ཧ་ལ་ཧ་ལ་ཞེས་བརྗོད་པས་ཕྱོགས་བཅུའི་སངས་རྒྱས་ཐམས་ཅད་ཞེ་སྡང་རྡོ་རྗེའི་སྐུ་རྗེས་སུ་དྲན་ནས། འཇིག་རྟེན་དྲུག
23a6 གི་ཕྱོགས་བཅུ་ཐམས་ཅད་ཁྲོ་བོ་འཆོལ་པའི་དཀྱིལ་འཁོར་གྱིས་གང་བར་གྱུར་ཏོ།། དེའི་ཚེ་འཇིག་རྟེན་དྲུག་གི་ཕྱོགས་མཚམས་ཐམས་ཅད་གཡོས་རབ་ཏུ་གཡོས།། ཀུན་ཏུ་རབ་ཏུ་གཡོས།། འཁྲུགས་རབ་ཏུ་འཁྲུགས།།
iiif viewer powered by OpenSeadragon
