| e-texts navigator |
| Wylie |
131b1 ཤེས་བསྐྱེད་དོ།། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། སྣང་ཞིང་སྲིད་པའི་ཆོས་ཐམས་ཅད་ཡུམ་ཀུན་ཏུ་བཟང་མོའི་མཁའ་དབྱིངས་སུ་རྣམ་པར་དག་པའི་རྟགས། དཔག་ཅིང་གཞལ་བ་ལས་འདས
131b2 པའི་གཞལ་ཡས་ཁང་། རྩེ་མོའི་དབྱིབས་བདག་ལས་མ་སྤགས་ཤིང་། གཞན་ལས་མི་མཐོང་བའི་མཐོ་བ་ཅན། རྒྱ་ཁྱོན་ཕྱོགས་བཅུར་བརྡལ་བར་ཡོངས་ལ་ཁྱབ་པ། ཕྱི་ནང་མ་གྲུབ་པའི་རིག་པ་ཕྱི་ནང་མེད་པར
131b3 ཕྱོགས་རིས་སུ་རྒྱུན་མ་ཆད་པས་བརྡལ་བ་ཆེན་པོ།། བྱིན་རླབས་ལྷའི་རྒྱན་དང་གཞལ་ཡས་སྤྲུལ་པའི་རྒྱན་དང་། རྟོགས་པ་ཡེ་ཤེས་ཀྱི་རྒྱན་གྱིས་ཡོངས་སུ་མ་བརྒྱན་ཅིང་བརྒྱན་པར་གྱུར་ཏོ།། དེའི་ཆེ་བའི་ཡོན་ཏན
131b4 ཀྱང་གྲངས་བགྲང་དུ་མེད་པའི་བཅུད་གཅིག་ཏུ་གྱུར་ཏོ།། དེ་ཉིད་མ་སྐྱེས་པའི་རང་བཞིན་ཡིན་པས་ཚིག་ཏུ་མ་བརྗོད་པར་གྲགས། དགོངས་པས་མ་བསྐྱེད་པར་གསལ་བས་རང་རྒྱུད་དུ་གནས་སོ།། དེ་ནས་ཉིད་ཀྱི་ཚེ
131b5 བའི་ངང་ནས། སྐྱེད་པའི་ཡུམ་ཀུན་ཏུ་བཟང་མོ་བྱུང་སྟེ། གཉིས་སུ་མི་སྣང་བའི་ཡབ་ཡུམ་གཉིས། ཟླ་གམ་སྤྲོས་པ་མེད་པ་དབང་གི་དཀྱིལ་འཁོར་ན། མ་ཆགས་པའི་དགྱེས་པ་བཞིན་མདངས་ཀྱིས། གཟིགས་པ་མི
131b6 མངའ་བར་གཟིགས་ཏེ། ཡབ་ཀྱིས་ཡུམ་ལ་འདི་སྐད་ཅེས་བསྐུལ་ལོ།། ཨེ་མ་ཧོ་སངས་རྒྱས་ཐམས་ཅད་ནི། རྡོ་རྗེ་གསང་བ་བྱང་ཆུབ་སེམས།། སྐུ་དང་གསུང་དང་ཐུགས་ཡོན་གྱི།། ཕྲིན་ལས་རྫོགས་པ་བླ་ན
iiif viewer powered by OpenSeadragon
