| e-texts navigator |
| Wylie |
300b1 སྨྲ་བའི་སེང་གེ་ལེགས་སོ།། ཕྱོགས་བཅུ་དུས་བཞིའི་སངས་རྒྱས་སྔར་འདས་པ་རྣམས་ཀྱིས་གསུངས་པ་དང་། ད་ལྟར་བཞུགས་པ་རྣམས་ཀྱིས་གསུངས་པ་དང་། སླད་ཀྱིས་བྱོན་པ་རྣམས་ཀྱིས་གསུང་བར་འགྱུར་བ
300b2 རྣམས་ཀྱི་དོན་ཐོག་མར་དགེ་བ་དང་། བར་དུ་དགེ་བ་དང་། ཐ་མར་དགེ་བ་དང་། དོན་བཟང་པོ། རྒྱུད་ཀྱི་འབྲེལ་པ། དོན་གྱི་བཀོད་པ། རྟགས་ཀྱི་རོལ་པ། ཡེ་ཤེས་རྔམ་པ་གློག་གི་འཁོར་ལོ་རྣམ་པར་བྱིངས་པ
300b3 གཞུང་ཆེན་པོ་འདི་ངས་བཤད་པར་བྱ་ཡིས་སྐལ་པ་དང་ལྡན་པ་རྣམས་གསང་སྔགས་ཀྱི་དོན་ཟབ་མོ་མི་ཟོས་པར་དཀའ་ན་ཐོས་ནས་དེའི་དོན་ལ་གནས་པར་བཀའ་སྟེ་ཕལ་གྱི་ཐུན་མོང་དུ་མ་གྱུར་པའོ།། འཕགས་པ
300b4 རྒྱུད་ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་སྔགས་ཀྱི་མདོ་བསྟན་པའི་ལེའུ་སྟེ་གསུམ་པའོ།། །། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ་སྙིང་པོ་བྱང་ཆུབ་ལ་ངེས
300b5 པར་འགྲེལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། ཞུགས་ནས་ཡང་འདུས་པའི་འཁོར་ཚོགས་ལ་བཀའ་སྩལ་ཏོ།། རིགས་ཀྱི་བུ་རྣམས་ཆོས་ཐམས་ཅད་ནི་བྱང་ཆུབ་སེམས་སུ་འདུས་ཤིང་བྱང་ཆུབ་ཀྱི
300b6 སེམས་ཉིད་སྣང་བ་ཤེས་པར་གྱིས་ཤིག། དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ལུས་དང་ངག་དང་སེམས་སུ་འདུས་ལ། ལུས་དང་ངག་དང་སེམས་ཉིད་ཆོས་ཐམས་ཅད་ཀྱི་རྣམ་པར་སྣང་ངོ་།། འདུས་པའི་འཁོར
iiif viewer powered by OpenSeadragon
