| e-texts navigator |
| Wylie |
156a1 འབྲས་བུ་དང་། རྐྱེན་དང་། རྒྱུའོ།། ལང་ཀའི་བདག་པོ་དེ་དག་ལ་སོགས་པ་གྲོང་ཁྱེར་གསུམ་གྱི་ཆེད་དུ་མཛད་པ་ཡོངས་སུ་སྣང་བར་མཛད་དོ།། དེ་དག་ནི་ཐུགས་ཀྱི་མཛད་པ་ཡོངས་སུ་སྣང་བའོ།།
156a2 སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཐུགས་ཀྱི་མཛད་ཡོངས་སུ་རྫོགས་པའི་ལེའུ་སྟེ་སུམ་ཅུ་དགུ་པའོ།། །། དེ་ནས་ཡང་གསང་བ་པའི་བདག་པོས་ལང་ཀའི་བདག་པོ་ལ་སྨྲས་པ། ལང་ཀའི
156a3 བདག་པོ་གཞན་ཡང་སངས་རྒྱས་ཀྱི་ཆེད་དུ་ཡང་དག་པའི་གསང་བ་འདི་ཡོངས་སུ་གསུང་བར་མཛད་དོ། སངས་རྒྱས་རྣམས་ཀྱི་དམ་པ་ནི།། ཐམས་ཅད་ཉིད་ལས་མི་གཞན་ཕྱིར།། ཅི་ཡང་བླང་དོར་མེད་པ་ན།། རྡོ་རྗེ
156a4 ནམ་མཁའ་གདོན་མི་ཟ།། ལང་ཀའི་བདག་པོ་ཡང་རང་སངས་རྒྱས་ཀྱི་ཆེད་དུ་སྣང་བ་རྡོ་རྗེ་བསྟན་པ་འདི་གསུང་བར་མཛད་དོ།། ངག་གི་རྡོ་རྗེ་ཡི་གེ་མེད།། ལུས་ཀྱི་རྡོ་རྗེ་སྣང་སྟོན་པ། གང་གི་ཡིད་ནི་འདིར་བཅུག
156a5 སྟེ།། གསང་བ་ཉིད་དུ་རབ་ངེས་པའོ།། ལང་ཀའི་བདག་པོ་ཡང་གསང་བ་མཆོག་གི་བདག་པོ་དེས།། ཉན་ཐོས་ཀྱི་ཆེད་དུ་བསླབ་པ་རྡོ་རྗེ་མཛད་པ་འདི་གསུང་བ་མཛད་དོ།། སྒོ་གསུམ་རྡོ་རྗེ་བྱེ་བ་བཅུ།། བསྲུང་བ
156a6 ཡོངས་སུ་དག་པའི་མཐའ།། ཞི་བ་ཕྱོགས་ཡིད་འདིར་བཅུག་སྟེ།། དམ་པ་ཉིད་དུ་རབ་ངེས་པའོ།། ལང་ཀའི་བདག་པོ་ཡང་སྐྱེས་བུ་དམ་པ་དེས་རྣལ་འབྱོར་སེམས་དཔའ་ཆེད་དུ་ལྟ་བ་རྡོ་རྗེ་གསང་བ་འདི་གསུངས
iiif viewer powered by OpenSeadragon
