| e-texts navigator |
| Wylie |
131b1 གང་ཞེ་ན། འཇིག་རྟེན་དང་འཇིག་རྟེན་ལས་འདས་པ་དང་ཐུན་མོངས་པའོ།། འཇིག་རྟེན་ལས་འདས་པའི་ཡི་གེ་གང་ཞེ་ན། ཨོཾ་དང་། ཧཱུཾ་དང་།། མཱཾ་དང་། སྲཾ་དང་། ཨཾ་དང་། ཧཾ་དང་། ཨ་རྣམས་སོ།། ལང་ཀའི
131b2 བདག་པོ་འདི་ལ་འཇིག་རྟེན་པའི་ཡི་གེ་གང་ཞེ་ན། འདི་ལྟ་སྟེ། རྩ་བ་དང་། ཟིན་པ་དང་། གྲགས་པའོ།། རྩ་བ་གང་ཞེ་ན། ས་བོན་དྲུག་གང་ཡིན་པའོ།། ཟིན་པ་གང་ཞེ་ན། གང་འགྲོ་བ་རྣམས་ཀྱི་སྒྲ་སྐད་ཀུན་ཡི་གེས
131b3 ཟིན་པ་ཁོ་ནའོ།། གྲགས་པ་གང་ཞེ་ན། ལྷའི་ཡི་གེ་དང་། ཀླུའི་ཡི་གེ་དང་། ལྷ་མ་ཡིན་གྱི་ཡི་གེ་དང་། མིའི་ཡི་གེ་དང་། གནོད་སྦྱིན་གྱི་ཡི་གེ་ལ་སོགས་པ་འཇིག་རྟེན་ཐ་དད་གྱི་ཡི་གེར་གྲགས་པ་གང་ཡིན་པའོ།། ཐུན
131b4 མོང་གི་ཡི་གེ་གང་ཞེ་ན། ཨ་དང་ཀ་ལ་སོགས་པའོ།། ལང་ཀའི་བདག་པོ་འདི་ལ་ཡི་གེའི་གཞི་གང་ཞེ་ན། ཨ་དང་། ཨོཾ་དང་ཧཱུཾ་དང་། མཱཾ་ཞེས་ཐམས་ཅད་འབྱུང་བའི་གཞིར་གྱུར་པའོ།། གསང་བའི་བདག་པོས་དེ་སྐད
131b5 ཅེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཅན་གྱི་སེམས་དཔའ་རྣམས་ཐམས་ཅད་གསུང་གི་མི་ཟད་པ་རྒྱན་གྱི་འཁོར་ལོར་རིག་པར་གྱུར་ཏོ།། སངས་རྒྱས་ཀུན་གྱི་དགོངས་པ་འདུས་པའི་མདོ
131b6 ཆེན་པོ་ལས་གསུང་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་ཞེས་བྱ་སྟེ་སུམ་ཅུ་བཞི་པའོ།། །། དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་ལ
iiif viewer powered by OpenSeadragon
