| e-texts navigator |
| Wylie |
96a1 དཔའི་སྤྱོད་པ་དང་། ཆོས་ཉིད་ལ་ལོངས་སྤྱོད་ཆེན་པོས་མངའ་མཛད་པའི་དོན་མ་ནོར་བར་ཤེས་པར་བྱའོ།། ངེས་པའི་གསང་བའི་མན་ངག་ནི་རྨད་དུ་བྱུང་བའི་དོན་ནོ།། རྨད་དུ་བྱུང་བ་གསང་བ
96a2 ནི་ཐམས་ཅད་བདག་ཉིད་ལས་བྱུང་ཞིང་བདག་ཉིད་ཀྱིས་མཛད། བདག་ཉིད་ལས་སྤྲོས་ཤིང་བདག་ཉིད་དེ་ལ་རོལ་ལོ།། བདག་ལས་སྤྲུལ་ཞིང་བདག་ཉིད་ཡོངས་སུ་སྡུད། བདག་ཉིད་ལས་བྱུང་བའི་ཆོས་ལ་བདག།
96a3 ཉིད་ལོངས་སྤྱོད་མཛད། བདག་ཉིད་ཀྱི་ཡོན་ཏན་ལས་བདག་ཉིད་ཆེ་བ་སྟོན། བདག་ཉིད་ལས་བྱུང་བའི་ཆོས་རྣམས་ལ་བདག་ཉིད་སྟོན་པར་བྱེད།། སླར་ཡང་བདག་ཉིད་ཀྱི་དབྱིངས་སུ་འདུས་ཏེ། བདག་ཉིད་ལས
96a4 མ་བྱུང་བའམ། བདག་ཉིད་དུ་མ་གྱུར་པ་གཅིག་ཀྱང་མེད་དོ།། ཆོས་ཆེན་པོ་རྨད་དུ་བྱུང་བ་ལས། གསང་བ་རྨད་དུ་བྱུང་བའི་ལེའུ་སྟེ་བཅུ་གསུམ་པའོ།། །། སངས་རྒྱས་ཀུན་གྱི་ཐུགས་ནི་གང་།། བདེ
96a5 གཤེགས་ཐམས་ཅད་འབྱུང་གནས་སོ།། སེམས་ཅན་གྱི་རྣམ་པར་ཤེས་པ་བརྒྱད་པོ་ནི། གསང་བ་འདུས་པའི་དཀྱིལ་འཁོར་ཡེ་ཤེས་རང་ལས་བྱུང་བ་ཡེ་ཤེས་ཀྱི་ལྷ་ཉིད་དོ།། རྣམ་པར་ཤེས་པའི་ཡུལ་བརྒྱད་ནི།།
96a6 མཆོད་པའི་ལྷ་མོ་བརྒྱད་དང་། དངོས་གྲུབ་ཀྱི་རྫས་བརྒྱད་དོ།། སེམས་དཔའ་ཆེན་པོ་སྒོ་ལྔ་སྟེ། ཤེས་རབ་ཟབ་མོའི་སྒོ་དང་། གསང་རྒྱུད་མཐར་མི་འགེག་པའི་སྒོ་དང་། ཆོས་ཀྱི་འཁོར་ལོ་མཐར་བསྐོར་བའི་སྒོ་དང་།
iiif viewer powered by OpenSeadragon
