| e-texts navigator |
| Wylie |
7a1 མེད།། རང་གསལ་ཡུལ་ལ་མི་རྟོག་པས།། ཡེ་ཤེས་ཐིག་ལེ་ཉི་མ་ཤར།། སྣང་མེད་མ་འགགས་ཅིར་མི་དགོངས།། སྣང་བ་རིག་པའི་ཐིག་ལེར་བསྡུས།། སྡུག་བསྔལ་བདེ་བའི་ངང་དུ་གནས།། རེ་འདོད
7a2 ཀུན་བྲལ་ཐོབ་སྤང་མེད།། རང་བྱུང་བདེ་བའི་སེམས་ཉིད་ལ།། སྣང་བ་ཉིད་དུ་གྲུབ་པ་མེད།། བདེ་ཆེན་རིག་པ་མཚོ་ལྟར་ཟབ།། ཡེ་ཤེས་རིག་པ་མཁའ་ལྟར་མཉམ།། དངོས་གྲུབ་རིན་ཆེན་འོད་ལྟར་འབྱུང་།། ཞེས
7a3 གསུངས་སོ།། བྱང་ཆུབ་ཀྱི་སེམས་རིན་ཆེན་འཁོར་ལོ་ལས། ལྟ་བ་བསྟན་པའི་ལེའུ་སྟེ་གསུམ་པའོ།། །། དེ་ནས་རིག་པའི་རྒྱལ་པོས་རང་བཞིན་བསྟན་པའི་དོན་གསུངས་པ།། རིག་པའི་སེམས་ཉིད་སྣང་མེད
7a4 ལ།། ཏིང་འཛིན་མི་གཡོ་འཇུག་པ་མེད།། རྩོལ་མེད་རིག་པ་བསམ་དང་བྲལ།། ཡེ་ཤེས་རྫོགས་པའི་འཁོར་ལོ་ལ།། ཐིག་ལེ་བདེ་ཆེན་བསམ་མི་ཁྱབ།། རོལ་པ་བདེ་ཆེན་ཆུ་རླབས་ལྟར།། ཡེ་ཤེས་ཇི་བཞིན་མི་བསྐྱོད
7a5 པ།། ཡེ་ནས་ཡིན་ཕྱིར་བྱ་མི་དགོས།། ཡེ་ཤེས་གསལ་བའི་ཕྱག་རྒྱ་ཡིས།། མཚན་མ་ཡེ་ཤེས་འཁོར་ལོ་བསྐོར།། འཛིན་པའི་རང་བཞིན་ཀུན་དང་བྲལ།། རང་བྱུང་སྙིང་པོ་གཡོ་མེད་ན།། དབང་བསྒྱུར་རྒྱལ
7a6 བའི་ཐུགས་དང་མཉམ།། ཏིང་འཛིན་རང་བཞག་མཁའ་དང་མཉམ།། མི་འགྱུར་ཡེ་ཤེས་མཁའ་ལྟར་ཁྱབ།། རྩོལ་བྲལ་རིག་པའི་ཡེ་ཤེས་ལ།། ཡེངས་པ་མེད་པར་རང་བཞིན་བཞག། དབང་པོའི་ངོ་ལ་སྣང་བ
iiif viewer powered by OpenSeadragon
