| e-texts navigator |
| Wylie |
46a1 ཁྱུད་མོ་ལྟར་འཁོར་བའོ།། ཨེ་མ་ཧོ་བདེ་བ་ཆེན་པོ་དེས་ན་འཁོར་འདས་ནི་ངོ་བོ་གཅིག་ལ་རྐྱེན་གཉིས་ཁོ་ནའོ།། རང་བཞིན་གཅིག་ལ་སྣང་བ་གཉིས་ཁོ་ནའོ།། མཚན་ཉིད་གཅིག་ལ་ཡུལ་གཉིས་ཁོ
46a2 ནའོ།། གཅིག་ཏུ་ཤེས་ན་ཡེ་ཤེས་དེ་ཁོ་ནའོ།། བྱུང་ས་ཤེས་ན་ཕུ་ཐག་ཆོད་པ་ཁོ་ནའོ།། ཕུ་ཐག་ཆོད་ན་འགྲོ་ས་མེད་པའོ།། འགྲོ་ས་མེད་ན་གཡང་ས་བྲལ་བའོ།། གཡང་ས་མེད་ན་འཕོ་འགྱུར་མེད་པའོ།། དེ་ལྟར
46a3 ཤེས་ན་རྟག་ཆད་བྲལ་བའོ།། བྲལ་བར་ཤེས་ན་མ་བྲལ་མེད་པའོ།། མ་བྲལ་བ་ཉིད་ན་བྲལ་བ་མེད་པའོ།། བྲལ་དང་མ་བྲལ་ཀུན་ཏུ་ཁྱད་མེད་པའོ།། ཨེ་མ་ཧོ་བདེ་བ་ཆེན་པོ་མི་གནས་པའི་ཆོས་ཉིད་ལ། གཉིས་སུ
46a4 འཛིན་པའི་སྒྲོས་མི་གདགས།། འདུ་འབྲལ་མེད་པའི་ཡེ་ཤེས་ལ།། མཁྱེན་དང་མི་མཁྱེན་བསྙད་མི་འདུག། རང་བྱུང་ཡེ་ཤེས་རིག་པ་ལ།། འཁོར་འདས་གཉིས་སུ་བརྟགས་པས་ནོར།། རང་སེམས་ངོ་བོ་ཉིད་ཀྱི
46a5 དབྱིངས།། གཟུང་དུ་མེད་པས་ཆུ་ཟླ་འདྲ།། སྣང་ལ་ཞེན་རྟོག་མེད་པས་བདེ།། སྡུག་བསྔལ་བདེ་བ་ཆེན་པོ་ལ།། རྐྱེན་གྱི་ཁྱད་པར་ཉིད་དུ་འགྱུར།། ཞེས་གསུངས་སོ།། རིན་པོ་ཆེ་འཁོར་ལོ་བརྩེགས་པའི་རྒྱུད་ལས།།
46a6 རིག་པ་ཡེ་ཤེས་ཀྱི་ལེའུ་སྟེ་བརྒྱད་པའོ།། །། དེ་ནས་ཡང་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་གདམས་པའི་དོན་བསྟན་པ། ཨེ་མ་ཧོ་བདེ་བ་ཆེན་པོ་ཆོས་ཐམས་ཅད་རིག་པའི་རྩལ་ལས་མ་བྱུང་བ་ནི་གང
iiif viewer powered by OpenSeadragon
