| e-texts navigator |
| Wylie |
269b1 རང་བཞིན་ཡོན་ཏན་ཀུན་གསལ་བས།། ཡན་ལག་གསལ་བ་སྣང་བའི་རྡུལ་དུ་མཐོང་།། གསལ་བ་དེ་ཡིས་ཐམས་ཅད་སྐྱེད་གཞི་བྱས།། སྐུ་ཉིད་མ་མཐོང་ཡན་ལག་གསལ་བ་ལ།། མཐོང་བ་དེ་ཡིས་འཁྲུལ་པའི་རྒྱུ
269b2 ཉིད་བྱས།། དེ་གཉིས་འདྲ་མཐུན་རིགས་ཀྱང་མཐུན་པ་ཡིས།། ཉན་ཐོས་རང་སྣང་འཁྲུལ་པའི་འདྲ་གཞི་བྱས།། སྣང་བའི་རྡུལ་དེ་སྣོད་དང་བཅུད་དུ་བྱུང་།། སྐྱེད་པར་བྱེད་པའི་ཡན་ལག་དང་།། རང་སྣང་བ་ཡི་ཡན
269b3 ལག་གཉིས།། སྣང་བའི་རྡུལ་ལ་གཅིག་པར་རྫོགས།། སྣང་བ་རྡུལ་དེས་ཐམས་ཅད་སྒྲུབ།། སྣང་བའི་རྡུལ་གྱི་བྱིན་རླབས་ལ།། ཕྱི་ཡི་སྣོད་ཀྱི་རྣམ་པ་དེ།། རྡུལ་གྱི་གདངས་ལས་བྱུང་བ་ཡིན།། དཔེར་ན་མེ་མར་འོད
269b4 བཞིན་གྲུབ།། སྣོད་བཅུད་སྣང་བ་དེ་བཞིན་ཤར།། རྡུལ་ཉིད་མཚན་ཉིད་མེད་པ་སྟེ།། རང་བཞིན་གདངས་དང་ཆས་ནས་བྱུང་།། རྡུལ་གྱི་རང་བཞིན་རང་གསལ་བས།། གསལ་ལ་མི་འགྱུར་རྟོགས་པས་ན།། རྟོགས་པ
269b5 ཆེན་པོའི་ལྟ་བ་ཡིན།། དེ་ལ་བརྟེན་ནས་སྒོམ་པ་ཡིན།། དབྱེར་མེད་རྡུལ་དུ་སྤྱོད་པས་ན།། རང་བཞིན་བྱུང་བའི་སྤྱོད་པ་ཡིན།། རྡུལ་ཉིད་འོད་དང་ཆས་པས་རྟོགས།། རིག་པ་ཞིང་ཁམས་ཆས་ནས་སྣང་།། འཕགས་པ
269b6 དགྲ་བཅོམ་འབྲས་བུ་དེ།། གསལ་བའི་རྡུལ་ནས་གྲུབ་པ་ཡིན།། རིན་པོ་ཆེ་རྒྱས་པ་ཆེན་པོའི་རྒྱུད་ལས། ཉན་ཐོས་རང་སྣང་འཁྲུལ་པའི་ལེའུ་སྟེ་ཉེར་དགུ་པའོ།། །། སྡུད་པའི་གསང་དབང་རྡོ་རྗེ་སེམས་དཔའ
iiif viewer powered by OpenSeadragon
