| e-texts navigator |
| Wylie |
17b1 ཀུན་གྱི་རྒྱུ་ཉིད་པས།། འགྲོ་བ་རང་བྱུང་གཞན་ལས་མིན།། དེ་བས་སེམས་ཅན་ཐམས་ཅད་ནི།། སངས་རྒྱས་སྙིང་པོ་ཅན་རྣམས་ལས།། མ་རིག་རྟོག་པའི་ཕྲ་རྒྱས་ཀྱིས།། སྡུག་བསྔལ་སྣ་ཚོགས་མྱོང་བར
17b2 གྱུར།། སེམས་ཅན་ཀུན་གྱི་རང་བཞིན་ནི།། ཆོས་ཀྱི་དབྱིངས་ཀྱི་བྷ་ག་ཏེ།། ཀུན་ལ་ཁྱབ་པའི་ནམ་མཁའ་འོ།། དེ་མ་མཐོང་བས་དེ་མི་མཐོང་།། དེ་ནི་དེ་སྒྲིབ་སྐྱོན་ཆེན་ཡིན།། ཡངས་ལ་རྒྱ་ཆེ་གཏིང་ཟབ་པ།། ཤེས
17b3 རབ་ཅན་གྱིས་རྟོགས་གྱུར་ཏེ།། གང་ནས་མ་འོངས་གར་མི་འགྲོ།། འོང་དང་འགྲོ་བར་བྱ་བ་མིན།། ཇི་སྙེད་ཐེག་པ་རྣམ་མང་ཡང་།། ཡང་དག་དོན་གྱི་སྙིང་པོ་ནི།། གང་ནས་བཙལ་ཀྱང་མི་རྙེད་དེ།། རང་རིག་སྒྲིབ
17b4 མེད་དག་པ་ཡིན།། དངོས་པོ་འདི་དག་སྐྱེ་མེད་དེ།། ཡང་དག་མ་ཡིན་ཀུན་བརྟགས་ཡིན།། ཆོས་ཀྱི་དབྱིངས་ཀྱི་རང་བཞིན་ཡང་།། དེ་ཉིད་ལོག་པའི་ངོ་བོ་ལས།། ཁྱད་པར་འགའ་ཡང་ཡོད་པ་མིན།། དེ་བཞིན་ཉིད་ནི
17b5 ཆགས་མེད་དེ།། མ་སྐྱེས་མི་འགགས་མི་དམིགས་ཤིང་།། མི་རྟོག་བདེ་དང་ལྡན་པའོ།། དེ་བཞིན་གཤེགས་པ་ཐམས་ཅད་ཀྱི་རང་བཞིན། ནམ་མཁའ་ཆེ་རྒྱས་པའི་རྒྱུད་ལས། ཆོས་ཉིད་མི་འགྱུར་བ་བསྟན་པའི་ལེའུ
17b6 སྟེ་གསུམ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དགྱེས་པ་ཆེན་པོས། ཉིད་ཀྱི་ཆེ་བ་དབྱུང་བར་བཞེད་ནས། སྐུ་དང་ཡེ་ཤེས་ཀྱི་བདག་ཉིད་འདི་ལྟ་བུ་གསུངས
iiif viewer powered by OpenSeadragon
