| e-texts navigator |
| Wylie |
132b1 དྲུག་པའོ།། །། ལེའུ་འདིས་བྱང་ཆུབ་སེམས་རྨད་དུ་བྱུང་བའི་ངེས་ཚིག་བསྟན་ཏེ། དེ་ཡང་བྱང་བ་ནི། སྒྲིབ་པ་དང་བག་ཆགས་ཡེ་ནས་བྱང་བ་སྟེ། ཤེལ་སྒོང་ལག་མཐིལ་དུ་བཞག་པ་བཞིན་དུ་ཁམས་གསུམ་དང
132b2 དུས་གསུམ་དང་སྲིད་པ་གསུམ་དུས་གཅིག་ཏུ་མཁྱེན་པའི་ཡེ་ཤེས་མ་འགགས་པས། བློ་དང་ཞིང་དག་ལ་གསལ་ལ་དོན་ངེས་པ་ཡིན་ནོ།། ཆུབ་པ་ནི་ཏིལ་ལ་མར་གྱིས་ཁྱབ་པ་དང་འདྲ་བར། ཐམས་ཅད་ཀྱི་བཅུད་དུ
132b3 གྱུར་ཏེ། ལྷུན་གྱིས་གནས་པའི་ཆོས་ཉིད་ཀུན་གྱི་སྙིང་པོ། སྐུ་དང་ཡེ་ཤེས་ཀྱི་འབྱུང་གནས་སུ་གྱུར་པས་ཆུབ་ལ། སེམས་ནི་རྟོགས་པའི་ཡེ་ཤེས་སུ་གྱུར་པས། ཀུན་གཞི་གསང་བའི་དབྱིངས་ན་མ་བསླད་པའི་དོན།།
132b4 རྩོལ་དུ་མེད་པའི་ནོར་བུ་རིན་པོ་ཆེ་རང་བཞིན་དང་ཁ་དོག་ཏུ་འོད་གསལ་བ་ནི། སེམས་སྐྱེ་བ་མེད་པ་ཡིན་ལ། བདེ་བ་ནི་སྐུ་གསུམ་ཅིག་ཅར་རྫོགས་ཏེ་ཆོས་ཀྱི་དབྱིངས་སུ་དག་པས་ནི། དགྱེས་པ་ཆེན་པོར་བཞུགས
132b5 པས་བདེ་བ་ཡིན་ལ། ཆེན་པོ་ནི་གཉེན་པོ་གང་གིས་ཀྱང་བཅོས་སུ་མེད་པས། ནམ་མཁའ་ལྟར་རྒྱུ་ལ་མ་ལྟོས་ཡེ་ནས་དག། རྐྱེན་དང་མ་བྲལ་ཡེ་ནས་གནས། རྫས་དང་མཚན་མ་ལ་རག་ལུས་ཏེ། གོང་ན་ལ་བཟླར
132b6 མེད་པས་ཆེན་པོ་ཡིན་ནོ།། ཐུགས་ལ་ཡང་དོན་གསུམ་སྟེ། ཀུན་ལ་འཇུག་པ་དང་ཡིད་ཀྱི་མཚན་ཉིད་དང་། རིག་པའི་ཡེ་ཤེས་སོ།། སྐུ་ལ་ཡང་གསུམ་སྟེ། ཀློང་ཡངས་པའི་མཁའ་དང་། ཀུན་བདེ་བའི་སྐུ་དང་། བྱང
iiif viewer powered by OpenSeadragon
