| e-texts navigator |
| Wylie |
110b1 གནས།། དུས་གསུམ་འདི་དང་མི་འབྲལ་བའི།། ཐ་ཚིག་མིང་དུ་བཏགས་པ་མེད།། མི་གཡོ་བ་ནི་སྐུ་ཡི་རྒྱ།། མི་བསྐྱོད་པ་ནི་ཡེ་ཤེས་ཏེ།། མི་ལེན་པས་ན་བདག་མེད་ཅིང་།། མི་འདོར་ཚིག་བྲལ་མཉམ་ཉིད་དོ།། གང
110b2 དང་གང་གིས་གང་དག་ཏུ།། ཀུན་གྲོལ་ཀུན་སྦྱོར་བདག་ལས་བྱུང་།། འདི་ལས་སྐྱེས་པ་བུད་མེད་ཅེས།། མཉམ་པའི་རྒྱལ་པོས་ཡོངས་མ་གསུངས།། འདི་ལ་བརྟུལ་ཞུགས་དྲག་ཤུལ་གྱིས།། གནས་སུ་བྱ་བ་མིང་མེད
110b3 དེ།། ཨ་དང་པར་ནི་རྣམ་ལྡན་ན།། སྒྱུ་མའི་བདེ་བ་འབྱུང་བ་འདོད།། རང་བཞིན་གཅིག་ཏུ་མ་ངེས་པས།། ཇི་ལྟར་བལྟས་པ་དེར་སྣང་དེ།། སྣང་འདོད་རྩོལ་སེམས་བདེ་བ་ལས།། དེ་ནི་དེ་སྒྲིབ་སྐྱོན་ཆེན་ཡིན།། བྱང
110b4 ཆུབ་ཡན་ལག་ཀུན་གྱི་སྒོ།། ཆ་ལུགས་བསྒོམས་པས་ཆུ་ཟླ་འདྲ།། མ་གོམས་མ་ཆགས་འབྱུང་འགྱུར་ཡང་།། བསྒོམས་པས་བྱིས་པའི་སྤྱོད་ཡུལ་བཞིན།། དཀྱིལ་འཁོར་ཁྲོ་གཉེར་ཆ་ལུགས་ཀྱི།། ཁྲོ་བདག་ཆེན་པོའི
110b5 ལུས་བཟུང་བས།། ཡི་གེ་མངོན་དུ་གྱུར་ན་ཡང་།། ཞ་བ་དེ་ཉིད་མཐོང་བ་མིན།། ཉོན་མོངས་པ་ཡི་དབང་གིས་ན།། ཏ་ལའི་མགོ་བོ་བཅད་པ་དང་།། ས་བོན་མེ་ཡིས་བསྲེགས་པ་བཞིན།། དེ་ཡི་དབང་དུ་མི་འགྱུར
110b6 སྟོན།། རྣམ་གྲངས་བརྒྱ་སྟོང་ཕྲག་ཡས་པ།། གང་ལྟར་སྐྱེས་ཀྱང་མི་རྟོག་སྐྱེས།། མཚན་མ་མེད་པའི་དབང་གིས་ན།། བསྟི་གནས་དེ་ལས་འབྱུང་མི་འགྱུར།། གླིང་བྲལ་འདི་ལ་གནས་པ་ཡི།། རྣལ་འབྱོར་དེ་ནི་སྐལ་བ
iiif viewer powered by OpenSeadragon
