| e-texts navigator |
| Wylie |
68b1 ལ།། སྐལ་མེད་རྣམས་ཀྱི་སྤྱོད་ཡུལ་མ་ཡིན་པས།། རྒྱུ་དང་འབྲས་བུའི་ཆོས་ལ་སྤྱད་པར་བྱ།། ཞེས་གསུངས་སོ།། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རྫོགས་ཆེན་སྐལ་མེད་དོན་མེད་ཀྱི་ལེའུ་སྟེ་ཞེ་བཞི
68b2 པའོ།། །། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་རྫོགས་པ་ཆེན་པོ་ལ་ལྟ་བ་བསྒོམ་མེད་ཀྱི་མདོ་ལུང་འདི་བསྟན་ཏོ།། ཀྱེ་སེམས་དཔའ་ཆེན་པོ།། རང་གི་ལྟ་བ་བསྒོམ་མེད་ནི།། ཀུན་བྱེད་ང་ཡིན་པ
68b3 ལ་བསྒོམ་དུ་མེད།། ཀུན་བྱེད་ང་ནི་བསྒོམ་པའི་ཡུལ་མ་ཡིན།། ང་ནི་མ་བཅོས་ཀུན་ལ་རང་བཞིན་གནས།། རང་བཞིན་གནས་པའི་བསྒོམ་དུ་མེད་པ་དེ།། ང་ལས་བྱུང་བའི་སྟོན་པ་སྐུ་གསུམ་གྱིས།། ང་ལས་མངོན་དུ
68b4 ཕྱུང་བའི་ཆོས་ཉིད་ལ།། བརྐམ་ཆགས་ལྔ་ཡི་སྡུག་བསྔལ་ཡིན་ཟེར་ནས།། མ་བཅོས་མི་འཇོག་བརྟུལ་ཞུགས་སྤོང་འགེགས་བསྒོམ།། དེ་ལུང་བསྟན་པས་མ་བཅོས་དོན་དང་འགལ།། མུ་སྟེགས་སྡེ་བཞི་སྤྲུལ
68b5 པའི་ཐུགས་རྗེ་ཡིས།། བྱིན་བརླབས་འཁོར་དུ་བཀོད་ནས་ལུང་བསྟན་པས།། བྱ་བྲལ་བདེ་བ་དེ་ཉིད་ཐོབ་མི་འགྱུར།། ཀྱེ་སེམས་དཔའ་ཆེན་པོ།། ང་ལས་མངོན་དུ་ཕྱུང་བའི་ཆོས་ཉིད་ལ།། བརྐམ་ཆགས་ལྔ་ཡིས་སྡུག
68b6 བསྔལ་སྐྱེ་ཟེར་ནས།། དང་པོ་ས་ནས་བཅུ་པར་སེམས་དཔའ་ལ།། བདེན་པ་རྣམ་པ་གཉིས་ཀྱི་རྟོག་དཔྱོད་ཀྱིས།། དོན་དམ་མེད་ལ་ཀུན་རྫོབ་ཡོད་པ་རུ།། སྤྲུལ་པས་ལུང་བསྟན་རྟོག་དཔྱོད་སྒོམ་པ་བྱེད།། མ་བཅོས
iiif viewer powered by OpenSeadragon
