| e-texts navigator |
| Wylie |
345a1 བསྟན་པའི་ལེའུ་སྟེ་ང་བཞི་པའོ།། །། ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས།། བྱར་མེད་བྱང་ཆུབ་སེམས་ཆེན་དེ།། བཅོས་པས་གྲུབ་བམ་མ་བཅོས་འགྲུབ།། གསང་བའི་བདག་པོས
345a2 གསུངས་པ།། སེམས་དཔའ་ཆེན་པོ་ཉོན་ཅིག། བྱར་མེད་བྱང་ཆུབ་ཆེན་པོ་དེ།། བཅོས་པས་གྲུབ་པ་མ་ཡིན་ཏེ།། མ་བཅོས་རྣལ་དུ་བཞག་པས་གྲུབ།། སྔར་འདས་སངས་རྒྱས་ཐམས་ཅད་ཀྱིས།། ཅི་བཞིན་པ་ལས
345a3 བཅོས་མ་བྱས།། ད་ལྟའི་སངས་རྒྱས་ཐམས་ཅད་ཀྱང་།། ཅི་བཞིན་པ་ལས་བཅོས་མི་མཛད།། མ་འོངས་སངས་རྒྱས་ཐམས་ཅད་ཀྱང་།། ཅི་བཞིན་པ་ལ་བཅོས་མི་འགྱུར།། གསང་བའི་བདག་པོ་ང་ཡིས་ཀྱང་།། ཅི
345a4 བཞིན་པ་ལ་བཅོས་མ་མྱོང་།། སེམས་དཔའ་ཆེན་པོ་ཁྱོད་ཀྱིས་ཀྱང་།། ཅི་བཞིན་པ་ལ་བཅོས་མ་བྱེད། ཀྱེ་ཀྱེ་སེམས་དཔའ་ཆེན་པོ་ཉོན་ཅིག། ཆུ་མ་རྙོགས་ན་དངས། སེམས་མ་བཅོས་ན་གསལ། ལམ་མ་བགྲོད་ན་ཉེ།།
345a5 འབྲས་བུ་མ་དམིགས་ན་འཐོབ། ཉོན་ཅིག། རང་ལུས་མ་བཅོས་ལྷ་མ་བསྒོམས།། སྨྲ་བའི་ཚིག་དང་ངག་མ་འཆོས།། ཏིང་འཛིན་མ་བྱེད་སེམས་མ་འཆོས།། བཅོས་པས་རྣལ་དུ་འབྱོར་པ་མེད།། རྣལ་དུ་མ་འབྱོར་དོན
345a6 མི་འགྲུབ།། ཀྱེ་ཀྱེ་སེམས་དཔའ་ཆེན་པོ་ཉོན་ཅིག། ཅི་ལྟར་སྣང་བའི་ཆོས་རྣམས་དེ་བཞིན་ཉིད་དུ་གཅིག། དེ་ལ་སུ་ཡང་འཆོས་པར་མ་བྱེད་ཅིག། མ་བཅོས་མཉམ་པའི་རྒྱལ་པོ་དེ་ལ་ནི།། མི་རྟོག་ཆོས་ཀྱི་དགོངས་པ
iiif viewer powered by OpenSeadragon
