| e-texts navigator |
| Wylie |
327b1 པས།། དེས་ན་སེམས་ཉིད་ལམ་ཡང་ཡིན།། མངོན་དུ་གྱུར་པ་འབྲས་བུ་བས།། དེས་ན་སེམས་ཉིད་འབྲས་བུ་ཡིན།། ཞེས་སོ།། ཡང་གསུངས་པ།། བྱང་ཆུབ་སེམས་ཀྱི་ཆོས་ཉིད་དེ།། མ་བཅོས་རྣལ་དུ་བཞག་པ
327b2 ནི།། དེ་ནི་ཆོས་དབྱིངས་ཡེ་ཤེས་ཡིན།། གསལ་བ་རྟོག་པ་མེད་པ་ནི།། དེ་ནི་མེ་ལོང་ཡེ་ཤེས་ཡིན།། སེམས་ལ་དབྱེ་བ་མེད་པ་ནི།། དེ་ནི་མཉམ་ཉིད་ཡེ་ཤེས་ཡིན།། སྣང་ཚུལ་ཅིར་ཡང་སྣང་བ་ནི།། དེ་ནི་ཀུན་རྟོག་ཡེ
327b3 ཤེས་ཡིན།། སེམས་ཀྱིས་ཀུན་ལ་དབང་བསྒྱུར་བས།། དེ་ནི་བྱ་གྲུབ་ཡེ་ཤེས་ཡིན།། ཞེས་སོ།། ཡང་གསུངས་པ།། སེམས་ཉིད་ཅི་ལྟར་སྣང་བ་རྣམ་པར་སྣང་མཛད་ཡིན།། དུས་གསུམ་འཕོ་འགྱུར་མེད་པས་རྡོ་རྗེ
327b4 སེམས་དཔའ་ཡིན།། ཆེ་བའི་ཡོན་ཏན་འབྱུང་བས་རིན་ཆེན་འབྱུང་ལྡན་ཡིན།། སེམས་ཀྱིས་ཀུན་ལ་ཁྱབ་པས་སྣང་བ་མཐའ་ཡས་ཡིན།། བྱ་བཙལ་མེད་པར་གྲུབ་པས་དོན་ཡོད་གྲུབ་པ་ཡིན།། ཞེས་སོ།། ཡང
327b5 གསུངས་པ། མི་གཡོ་རང་བཞིན་གནས་པས་ཆོས་སྐུ་ཡིན།། གསལ་ལ་རྟོག་པ་མེད་པས་ལོངས་སྐུ་ཡིན།། སེམས་ལ་དབང་ཐོབ་ཅིར་ཡང་བསྒྱུར་ནུས་པས།། དེ་ནི་ཐུགས་རྗེ་སྤྲུལ་པའི་སྐུ།། རང་རིག་མངོན་དུ་གྱུར
327b6 པས་ནི།། མངོན་པར་བྱང་ཆུབ་སྐུ་རུ་འདོད།། གཉེན་པོས་འཕོ་འགྱུར་མེད་པ་ནི།། རྡོ་རྗེ་ལྟ་བུའི་སྐུ་རུ་འདོད།། ཅེས་གསུངས་སོ།། བང་མཛོད་འཕྲུལ་གྱི་ལྡེའུ་མིག་ལས། སྣང་ཚུལ་བསྟན་པའི་ལེའུ་སྟེ་ཉི་ཤུ
iiif viewer powered by OpenSeadragon
