| e-texts navigator |
| Wylie |
192a1 རྒྱ་གར་སྐད་དུ། སརྦ་དྷརྨཱ་མ་ཧཱ་སནྟི་བོ་དྷི་ཙིཏྟ་སཾ་སྭ་ར་མཱ་ལཙྪེ་ད་ན་ས་མུ་དྲ་ས་མཱ་བི་ལ་ཏནྟྲ། བོད་སྐད་དུ། ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་འཁོར་བ་རྩད་ནས་གཅོད་པ་རྒྱ་མཚོ
192a2 དང་མཉམ་པ་རྙོག་པ་མེད་པའི་རྒྱུད། བཅོམ་ལྡན་འདས་ཀུན་རིག་རྒྱལ་པོ་ལ་ཕྱག་འཚལ་ལོ།། འདི་སྐད་སྟོན་པ་གནས་འཁོར་དུས།། སངས་རྒྱས་རིན་ཆེན་ཟ་མ་ཏོག། རྙོག་མེད་རྒྱ་མཚོ་ལྟ་བུའི་ཀློང་།། འཁོར་བའི
192a3 རྒྱ་མཚོ་རྩད་ནས་བཅད།། ཀུན་བཟང་ཐུགས་ཀྱི་བྱིན་རླབས་ཀྱིས།། ཞལ་གྱི་པདྨོ་འཛུམ་པ་ལས།། ལྗགས་ཀྱི་འོད་ཟེར་ཕྱོགས་བཅུར་འཕྲོས།། འཇིག་རྟེན་ཁམས་ཉིད་དྲུག་ཏུ་གཡོས།། དེ་ནས་སེམས་དཔའ་རྡོ་རྗེ
192a4 ཡིས།། བཅོམ་ལྡན་འདས་ལ་འདི་སྐད་གསོལ།། འདས་པ་ཀུན་གྱི་སྔོན་རོལ་ན།། ཕྱོགས་བཅུའི་སངས་རྒྱས་ཀུན་གྱི་ཡབ།། བདེ་བ་ཐམས་ཅད་འབྱུང་བའི་གནས།། རྡོ་རྗེ་འཆང་ལ་ཕྱག་འཚལ་བསྟོད།། ཀུན་གཞི
192a5 རྩད་ནས་གཅད་པ་དང་།། ཤེས་བྱའི་གྲས་ཟག་ཆོད་པ་ཡིས།། རིག་པ་རང་སར་གྲོལ་བ་ནི།། སྟོན་པས་བདག་ལ་བཤད་དུ་གསོལ།། བཅོམ་ལྡན་འདས་ཀྱིས་བཀའ་སྩལ་པ།། ཀུན་གཞི་ཕྱོགས་རིས་མེད
192a6 པའི་ཨ།། མཚོན་པའི་ཚིག་ཏུ་གཏན་ཚིགས་བཞི།། ཐམས་ཅད་འབྱུང་བ་རྒྱ་མཚོའི་ཀློང་།། ཤེས་བྱ་སྣ་ཚོགས་སྣང་བ་ཡི།། མ་རིག་འཁོར་བའི་རྒྱ་མཚོ་འདི།། ལྷ་བསྒོམ་སྤྱོད་འབྲས་རྣམ་པ་བཞིས།། གཏན་ལ་ཕབ་སྟེ
iiif viewer powered by OpenSeadragon
