| e-texts navigator |
| Wylie |
119b1 བཞིན་ཀུན་ཏུ་རྡོ་རྗེས་འདུས་པའི་ཚོགས་ལ། ཆོས་ཐམས་ཅད་རྩ་བ་གཅིག་པ་ལས་བྱུང་བའི་དོན་བསྡུས་པ་འདི་གསུངས་སོ།། ཆོས་ཀུན་རྩ་བ་སེམས་སུ་གཅིག། རྩ་བ་གཅིག་ལ་དོན་གཉིས་ནི།། བདེ་དང་སྡུག
119b2 བསྔལ་ཐེག་པ་གཉིས།། ཕུན་སུམ་ཚོགས་པ་གསུམ་ཚོགས་པས།། ཡོ་ག་བཞི་ཡིས་བྱེ་བྲག་འབྱེད།། ཁྱད་པར་འཕགས་པའི་ཆེ་ལྔ་སྟོན།། གོལ་སྒྲིབ་དྲུག་དྲུག་སྐྱོན་ཡོན་སེལ།། གཏན་ལ་རྣམ་པ་བདུན་གྱིས
119b3 འབེབས།། ངེས་པའི་མན་ངག་བརྒྱད་དུ་སྟོན།། བདེན་པའི་ཚིག་དགུ་མཐུན་སྨྲས་ནས།། ཡོངས་སུ་རྫོགས་པའི་མདོ་བཅུ་ནི།། གཅིག་གི་རང་བཞིན་སྟོན་པར་བྱེད།། གཅིག་དང་གཉིས་དང་གསུམ་དང་བཞི།། ལྔ་དང
119b4 དྲུག་དང་བདུན་དང་བརྒྱད།། དགུ་དང་བཅུ་ཡི་བར་གྱིས་ནི།། གཅིག་དོན་ཡོངས་སུ་རྫོགས་པར་བསྟན། ཞེས་གསུངས་སོ།། བྱང་ཆུབ་སེམས་ཀྱི་འགྲེལ་པ་རྫོགས་པ་ཆེན་པོའི་མདོ་བཅུ་ལས། གླེང་གཞིའི་ལེའུ་སྟེ
119b5 དང་པོའོ།། །། དེ་ནས་འདུས་པའི་ཚོགས་ཐམས་ཅད་སེམས་དཔའ་རྡོ་རྗེའི་འཁོར་དུ་འཁོད་དེ། དད་པའི་སེམས་ཀྱི་འདུན་པས། སེམས་དཔའ་རྡོ་རྗེས་རྩ་བ་གཅིག་པའི་དོན་གསུངས་ཤིག་པར་རིག་ནས་བཀའ
119b6 སྩལ་པ། ཀྱེ་འདུས་པའི་ཚོགས་ཆེན་ད་ཉོན་ཅིག། བྱང་ཆུབ་སེམས་ཀྱི་མདོ་འདི་ལ།། གཅིག་ནི་ཀུན་གྱི་རང་བཞིན་ཏེ།། ཆོས་ཀྱི་དབྱིངས་སམ་བྱང་ཆུབ་སེམས།། ཡིན་པས་རྩ་བའི་དོན་དུ་བཞག། གཅིག་པའི་དོན་ནི
iiif viewer powered by OpenSeadragon
