| e-texts navigator |
| Wylie |
119a1 སེམས།། ཞེས་ཞུས་སོ།། དེ་ནས་ཀུན་ཏུ་བཟང་པོ་དེ་ཉིད་ཀྱིས་མི་དམིགས་པའི་དོན་ལ་བཞུགས་ནས། ཐུགས་རྗེ་ཡེ་ཤེས་འོད་ཟེར་སྤྲུལ་པ་སྤྲོས་པས། དུས་གསུམ་གྱི་དེ་བཞིན་གཤེགས་པ་ཐམས་ཅད
119a2 མཉེས་ནས་སེམས་དཔའ་རྡོ་རྗེ་ལ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་བསྡུས་ཏེ་བསྐུལ་བ་མཛད་དོ།། དོན་གྱི་ཚིག་གིས་ཀྱང་འདི་སྐད་བསྐུལ་ཏེ།། རྡོ་རྗེ་སྙིང་པོའི་སེམས་དཔའ་ཁྱོད།། ཀུན
119a3 གྱི་རང་བཞིན་ཁྱོད་ཡིན་པས།། སེམས་ཉིད་ཀུན་ཏུ་བཟང་པོ་འདི།། ཁྱོད་ཀྱིས་ཀུན་ལ་བསྟན་དུ་གསོལ།། ཞེས་བསྐུལ་ཏོ།། དེ་ནས་སེམས་དཔའ་རྡོ་རྗེ་དེས།། བདེ་བར་གཤེགས་པ་ཀུན་གྱིས་བསྐུལ་བར་རིག་ནས
119a4 མི་རྟོག་པའི་ཏིང་ངེ་འཛིན་གྱི་སྒོ་ནས། འོད་ཟེར་ཕྱོགས་བཅུར་བཀྱེ་ནས་སླར་བསྡུས་ཏེ། ཉིད་ཀྱི་སེམས་ཀྱི་སྐུ་བཞེངས་ནས་ཀུན་ལ་སྣང་བར་མཛད་དོ།། ཀུན་གྱི་རང་བཞིན་དུ་ཡང་བཞུགས་སོ།། རང་བཞིན་དེ་ཀུན
119a5 ལ་སྣང་ངོ་།། སེམས་ཀྱི་རང་བཞིན་ཡང་སྣང་བར་མཛད་དོ།། དེ་ནས་འདུས་པའི་ཚོགས་ཀྱིས། སེམས་དཔའི་རང་བཞིན་ཀུན་ཏུ་རྡོ་རྗེ་ལ་ཞུས་པ། ཨེ་མ་ཧོ་རྡོ་རྗེ་སྙིང་པོ་ཁྱོད།། བྱང་ཆུབ་སེམས་ནི་ཀུན་བཟང
119a6 ན།། ཉོན་མོངས་ལྔ་ཡི་སྡུག་བསྔལ་གང་།། ཁམས་གསུམ་གནས་ཀྱི་སྡུག་བསྔལ་གང་།། རྒྱུད་དྲུག་འཁོར་བའི་སྡུག་བསྔལ་གང་།། མཐོ་རིས་ངན་སོང་སྡུག་བསྔལ་གང་།། ཞེས་ཞུས་སོ།། དེ་ནས་སེམས་དཔའི་རང
iiif viewer powered by OpenSeadragon
