| e-texts navigator |
| Wylie |
104b1 བཞག། གཟའ་དང་རྒྱུ་སྐར་ཚེས་གྲངས་དུས་ཚོད་མེད།། ཡིད་ལ་མི་བྱེད་སྔགས་དང་ཕྱག་རྒྱ་བྲལ།། དེ་བས་ཀུན་བྱེད་བྱང་ཆུབ་སེམས་ཉིད་ལ།། བསྲུང་དང་མི་སྲུང་ས་མཚམས་མེད་པར་བཤད།། ཅེས་གསུངས
104b2 སོ།། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས།། ལྷ་སྒོམ་འདར་མེད་པའི་ལེའུ་སྟེ་བདུན་ཅུ་གཉིས་པའོ།། །། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་བྱ་མེད་རྩོལ་བ་དང་བྲལ་བར་རྟོགས་པ
104b3 འདི་གསུངས་སོ།། ཀྱེ་ང་ནི་ཀུན་བྱེད་རྒྱལ་པོ་སྟེ།། ཀུན་བྱེད་རྒྱལ་པོ་ང་ཡི་དགོངས་པ་ནི།། བསམ་པའི་ཡུལ་ལས་འདས་པས་བསྒོམ་དུ་མེད།། ཀྱེ་སེམས་ནི་ཇི་བཞིན་པ་ཡི་ངོ་བོ་སྟེ།། ཇི་བཞིན་པ་ལ་འཆོས་པར་བྱེད
104b4 མ་མྱོང་།། རང་འབྱུང་བ་ལ་རྒྱུ་རྐྱེན་ཀུན་དང་བྲལ།། སྒོ་གསུམ་བཙལ་མེད་ལྷུག་པ་ཉིད་དུ་ཞོག། གང་ཞིག་བྱ་རྩོལ་མཚན་མའི་རྗེས་འབྲངས་པ།། ཀུན་བྱེད་ང་དང་ཕྲད་པར་མི་འགྱུར་རོ།། ཀྱེ་སྟོན་པའི་ཀུན་བྱེད་ང་ཡི
104b5 ཕྲིན་ལས་ནི།། བྱ་བ་མེད་པས་རྩོལ་བའི་ལས་མི་བྱེད།། དམིགས་པ་མེད་པས་བསྒོམ་པའི་འདུ་ཤེས་བྲལ།། འདུ་འབྲལ་མེད་པས་མ་བརྗེད་ཡིད་ལ་ཞོག། བྱུང་ཚོར་སྐྱེ་བ་མེད་པས་གསལ་འགྱུར་ནས།། གང་ཡང
104b6 བྱས་པ་མེད་པར་ལས་ཀུན་གྲུབ།། ཀྱེ་ང་ནི་སྟོན་པ་ཀུན་བྱེད་རྒྱལ་པོ་སྟེ།། རྒྱལ་བ་ཀུན་གྱི་ཕྲིན་ལས་ངས་བྱས་ཀྱང་།། རང་འབྱུང་ཡེ་ཤེས་བྱ་མེད་རྫོགས་པའི་ཕྱིར།། ཇི་བཞིན་པ་ཡི་ལས་ལ་བྱེད་མ་མྱོང་།། མ་བཙལ
iiif viewer powered by OpenSeadragon
