| e-texts navigator |
| Wylie |
104a1 དཔའ་རྡོ་རྗེ་དོན་ལ་གོམས་པར་གྱིས།། དགོངས་དོན་གསང་བའི་རིག་པ་མ་ཤར་ན།། ཚིག་དང་སྒྲ་ལ་འཛིན་པའི་གོམས་པ་དག། ཀུན་བྱེད་ང་ཡི་ལུང་དང་ཕྲད་མི་འགྱུར།། བསྲུང་དུ་མེད་པའི་དམ་པའི
104a2 དགོངས་པ་འདི།། ཀུན་དུ་ཡེ་ནས་མ་བསྲུངས་གནས་པ་ལ།། ཀུན་བྱེད་ང་ཡི་དགོངས་པ་མ་གོམས་ན།། ཇི་ལྟར་བསྲུངས་པ་ཚེ་ཆད་ནད་དུ་འགྱུར།། ཀྱེ་ཀུན་བྱེད་ང་ཡི་དགོངས་པའི་དམ་ཚིག་ནི།། མ་ཡེངས་དྲན་པས
104a3 དངོས་པོ་ཡེ་ཤེས་སུ།། མ་བཅོས་སུས་ཀྱང་མ་བྱས་རང་འབྱུང་སྟེ།། རིག་པས་དབང་བསྐུར་བསྲུང་དང་མི་སྲུང་མེད།། ཇི་ལྟར་སྣང་བའི་ཆོས་རྣམས་ཐམས་ཅད་ཀུན།། རང་འབྱུང་སྙིང་པོར་གསལ་བས་དབང་བསྒྱུར
104a4 བས།། ཀུན་བྱེད་རྒྱལ་པོས་བྱས་པའི་ཆོས་རྣམས་ལ།། རིག་དང་མ་རིག་གཉིས་ཀའི་ཡུལ་ལས་འདས།། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས།། བསྲུང་དང་མི་སྲུང་ཡུལ་ལས་འདས་པ་ལྟར།། སེམས་དཔའ་རྡོ
104a5 རྗེས་དོན་ལ་གོམས་བྱས་ནས།། ང་ཡི་འཁོར་ལ་དེ་ལྟར་ལུང་སྟོན་ཅིག། ང་ཡི་འཁོར་ལ་དེ་ལྟར་ལུང་བསྟན་ན།། བྱ་བའི་འདུ་ཤེས་ལམ་ལས་གྲོལ་བར་འགྱུར།། སྐྱེ་བ་མེད་པས་ཀུན་ཀྱང་ཞི་བར་འགྱུར།། ཀུན་བྱེད
104a6 རྒྱལ་པོ་ང་ཡི་ཐུགས་སུ་འགྱུར།། ཀྱེ་ང་ནི་ཀུན་བྱེད་རྒྱལ་པོ་བྱང་ཆུབ་སེམས།། ང་ལ་སྒྲོ་དང་སྐུར་པའི་ཡུལ་མེད་པས།། གང་ལ་སེམས་པར་མ་བྱེད་བསྒོམ་མ་བྱེད།། སྒོ་གསུམ་བཅོས་པར་མི་བྱ་ལྷུག་པར
iiif viewer powered by OpenSeadragon
