| e-texts navigator |
| Wylie |
47b1 འབྲས་བུ་དང་བཅས་པ་བསྒོམ་པར་བྱ་སྟེ། ལམ་དངོས་སུ་བྱེད་པ་ནི། དཔེའི་ཡེ་ཤེས་ལས་ཤེས་པར་བྱའོ།། ལམ་ལ་གནས་པ་ནི། ཡེངས་པ་མེད་པའི་གདེང་གིས་ཟིན་ཏེ་དུས་ཐམས་ཅད་པའོ།། ལམ་མངོན་དུ་གྱུར
47b2 པ་ནི། རིག་པ་གཅེར་བུར་ཕྱུང་བའི་མན་ངག་ལས་ཤེས་པར་བྱའོ།། ལམ་ཀྱི་འབྲས་བུ་མཐར་ཕྱིན་པ་ནི། སྐུ་གསུམ་ཡེ་ཤེས་བཞི་ལྡན་གྱི་དགོངས་པ་མཐར་ཕྱིན་ནས་བག་ཆགས་ཀྱི་ལུས་ལ་ཉམ་ང་བ་མེད
47b3 པའོ།། ནང་ཡེ་ཤེས་ཀྱི་དཀྱིལ་འཁོར་ལ་བརྟེན་ཏེ་བསྒྲུབ་པ་ནི། གོང་མའི་རྩལ་འབྱོངས་ནས། ཐུགས་རང་བྱུང་གི་དཀྱིལ་འཁོར་ཡེ་ཤེས་ཀྱི་སྒོ་ཕྱེ་སྟེ། འོད་ཀྱི་ལུས་ཀྱི་ནད་མེད་པའི་ནང་ན། རང་སྣང་རྟོགས་པའི
47b4 འཁོར་ལོ། རང་རང་གི་ཚོམ་བུ་དང་བཅས་པ་ལ། རིག་པ་མར་མེའི་འོད་གསལ་ཏེ། ས་ལེ་སང་ངེ་ལྷག་གེ་ལྷན་ནི། ཐོག་མ་ནས་གནས་པ། མ་བྱས་པར་རང་བྱུང་བ། མ་བཅོས་མཛེས་སྡུག་རྒྱན་དང་ལྡན་པ་དེ་སྒྲུབ་པ
47b5 ནི་གངས་ལ་ཉི་མ་ཤར་བ་ལྟ་བུ་ཚིག་གསུམ་གྱིས་འགྲུབ་སྟེ། དམ་ཚིག་གི་སྔགས་དང་ཕྱག་རྒྱ་རང་ཡིད་ལ་དྲན་པ་ཙམ་གྱིས་འགྲུབ་པར་འགྱུར་རོ།། དེ་ལ་འབྱོངས་ན་གསང་བ་བྱང་ཆུབ་སེམས་དངོས་སུ་གྲུབ་པ
47b6 ནི། ཐོག་ལྟ་བུའི་མན་ངག་གིས་ཐོག་མའི་རང་ས་བཟུང་། གཟེར་ལྟ་བུའི་མན་ངག་གི་ཚིག་དང་ཡི་གེའི་དོན་མཐའ་བསྐུལ། ཁྱུང་ལྟ་བུའི་མན་ངག་གིས་རྩོལ་བའི་མཐའ་གློད་ལ་བཞག། སྐར་མདའ་ལྟ་བུའི་གདམས
iiif viewer powered by OpenSeadragon
