| e-texts navigator |
| Wylie |
315a1 གཅིག་ཀྱང་མེད།། བྱང་ཆུབ་སེམས་རྗེ་བཙན་དམ་པ་རྡོ་རྗེ་འོད་འཕྲོ་བའི་རྒྱུད་ལས། ཐམས་ཅད་སེམས་ལས་བྱུང་བར་བསྟན་པའི་ལེའུ་སྟེ་གསུམ་པའོ།། །། དེ་ནས་རྡོ་རྗེ་སེམས་དཔས་གསོལ
315a2 པ། ཀྱེ་བཅོམ་ལྡན་འདས་སེམས་ཀྱི་ངོ་བོ་གང་ལགས། བཅོམ་ལྡན་འདས་ཀྱིས་བཀའ་སྩལ་པ།། སེམས་དཔའ་ཆེན་པོ་སེམས་ཀྱི་རང་གི་ངོ་བོ་ནི།། ཅི་ཡང་མིན་ལས་ཅིར་ཡང་སྣང་།། དཔག་མེད་བརྗོད་བྲལ་བསམ
315a3 མི་ཁྱབ།། འདི་ཞེས་མཚོན་དུ་མེད་པ་ནི།། སེམས་ཀྱི་ངོ་བོར་དེ་གསུངས་སོ།། འགྲོ་བའི་སྡུག་བསྔལ་སྣང་བ་ཡང་།། རང་ཡིན་གཞན་ལས་དེ་མི་འབྱུང་།། བདེ་དང་ཐར་དང་ལོངས་སྤྱོད་ཀྱང་།། ཆོས་ཉིད་དབྱིངས
315a4 ལས་མ་གཏོགས་པ།། རྡུལ་ཆ་ཙམ་ཡང་མེད་པར་གསུངས།། སྐུ་དང་རྒྱན་གྱི་འཁོར་ལོ་ཡང་།། རང་གི་སེམས་ཡིན་གཞན་ན་མེད།། སངས་རྒྱས་ཆོས་དང་དགེ་འདུན་ཡང་།། རང་ཡིན་དེ་ལས་གཞན་ན་མེད།། དེ་ཕྱིར
315a5 བཀུར་བའི་ཡུལ་ཡང་མེད།། བསྲུང་མེད་བསྒྲུབ་མེད་རྩོལ་བ་མེད། ཁ་དོག་དབྱིབས་དང་གནས་རིས་མེད།། བདེ་དང་སྡུག་བསྔལ་རྒྱུ་འབྲས་མེད།། མེད་པ་མ་ཡིན་ཀུན་བདག་ཉིད།། ཡོད་པ་མ་ཡིན་བརྗོད་དུ
315a6 མེད།། བདག་མེད་གཞན་མེད་འཆི་འཕོ་མེད།། མེད་པ་མ་ཡིན་ཐམས་ཅད་འབྱུང་།། འབྱུང་བ་མ་ཡིན་དེ་ཉིད་ཡིན།། ཀུན་གཅིག་ཡེ་ཤེས་ཁྱབ་པའི་ངང་།། ནམ་མཁའི་ཆུ་ཡི་རོ་མཐུན་བཞིན།། དབྱེ་བསལ་མེད་པའི
iiif viewer powered by OpenSeadragon
