| e-texts navigator |
| Wylie |
29b1 ལོངས་སྐུ་སྦྲུལ་སྐུ་གསུམ།། སྐུ་རེ་ལའང་གསུམ་གསུམ་བསྟན།། ཐུགས་རྗེ་ཡས་བབས་སྐུ་གསུམ་དང་།། ཛ་ལོག་སྐུ་གསུམ་ཤེས་པར་བྱ།། རབ་ལ་བར་དོ་མེད་པ་ཡང་།། དུས་བཞི་མཉམ་སྦྱོར་དགོངས་པ
29b2 ཡིན།། བར་དོར་སྐུ་གསུམ་དྲན་པར་འགྱུར།། འོད་དང་འགྱུ་བ་ཡིད་དང་གསུམ།། དགུ་ཕྲུག་ཤེས་པ་ངོ་སྤྱོད་དོ།། དེ་ཡིས་གྲོལ་བར་འགྱུར་བ་ཡིན།། དེ་ལས་གྲོལ་ནས་ཤར་བ་ནི།། མཆོག་གི་སྐུ་གསུམ་ཞེས་སུ
29b3 བཤད།། དེ་ཡི་ངོ་སྤྱོད་མ་ཤེས་ན།། གདམས་པ་བསྟན་པ་སྐྱོན་དུ་འགྱུར།། ཐུགས་རྗེ་འབྱུང་བར་མ་ཤེས་ན།། ཉི་མ་འོད་དང་བྲལ་པ་ལྟར།། གཟུགས་སྐུ་གཉིས་པོ་འཆར་མི་འགྱུར།། གཟུགས་སྐུ་གཉིས་པོ་མ་ཤར
29b4 ན།། འགྲོ་དྲུག་སྟོན་པ་གང་ལས་འབྱུང་།། འདུ་དུས་ཐིམ་དུས་འཆར་དུས་དང་།། དེ་གཉིས་གྲོལ་བར་འདུས་དང་བཞི།། དེ་བཞིའི་སོ་མཚམས་མ་ཤེས་ན།། སངས་རྒྱས་དུས་ཚོད་ཤེས་པ་དཀའ།། མར་གྱི་དུས་བཞི
29b5 ཡར་གྱི་བཞི།། བར་དོའི་སོ་མཚམས་མ་ཤེས་ན།། འཁོར་བའི་འཕྲོ་མཐུད་དུས་ཚོད་དཀའ།། འདུ་དུས་ཐིམ་དུས་འཆར་དུས་རང་གྲོལ་དུས།། འདུ་དུས་ཐིམ་དུས་འཆར་དུས་ལུས་འཇུག་དུས།། འདྲ་འདྲ་འདྲ་སྟེ་ནོར
29b6 ས་ཆེ།། དེས་ན་བརྟག་པ་རབ་ཏུ་དཀའ།། འཁོར་བ་ཙམ་དུ་སྒྲ་མཐུན་ཡང་།། རྒྱུ་དང་དཀར་ནག་འབྲས་བུ་བཞི།། དེ་ཡི་སོ་མཚམས་ཁྱད་པར་ཆེ།། ལུས་པོ་ཙམ་དུ་སྒྲ་མཐུན་ཏེ།། འཇུག་པའི་ལུས་ལ་ཁྱད་པར
iiif viewer powered by OpenSeadragon
