| e-texts navigator |
| Wylie |
230b1 ཡིན།། དགོངས་པ་རིག་པས་མཉམ་དུ་ཤེས།། མ་བལྟས་གསལ་བ་ཡེ་ཤེས་ཡིན།། རང་བྱུང་ཡེ་ཤེས་ཉིད་ཡིན་པས།། བཙལ་བའི་བསམ་པ་གདོད་ནས་དག། ཡིན་ནི་ཅི་ཡང་མ་ཡིན་ལ།། གསལ་ནི་ཀུན་ལ་མཐུན
230b2 པར་གསལ།། འབྱུང་འཇུག་མེད་པར་རིག་པའི་མཐའ།། མཚན་ཉིད་ངེས་པར་གཟུང་དཀའ་བས།། གང་ཡང་མ་ཡིན་ཕྱོགས་བྲལ་ཡིན།། བྱམས་མགོན་ཕྱོགས་རིས་མེད་པའི་གཏེར།། རང་གསལ་རིག་པའི་མཚན
230b3 ཉིད་ཅན།། མཚན་གཞི་བརྟགས་པའི་ཡུལ་ལས་འདས།། རང་བྱུང་རྟག་པ་མཆོག་གི་སྐུ།། སྤྲོས་བྲལ་བརྗོད་མེད་རིག་པའི་གསུང་།། མཚན་འཛིན་དྲན་རྟོག་མེད་པའི་ཐུགས།། འཕེལ་འགྲིབ་མེད་པའི་ཡོན་ཏན
230b4 གཏེར།། བྱ་བཙལ་བྲལ་བའི་ལམ་ཆེན་པོ།། ཀུན་ལ་ཁྱབ་ཅིང་རང་ལ་གད་ལ།། དམིགས་སུ་མེད་ཅིང་བསྟན་དུ་མེད།། རང་གསལ་མེ་ལོང་འོད་པོ་ཆེ།། མ་བཅོས་རིག་པའི་ཁྱད་པར་ལས།། ཅི་ལྟར་བལྟས་པ་དེ་ལྟར
230b5 སྣང་།། ཐམས་ཅད་རང་གསལ་རིག་པ་ཡང་།། འཁྲུལ་པའི་ཤེས་པ་ཅིར་མི་འདོད།། སྤྲོས་བྲལ་རིག་པའི་འཁོར་ལོ་ལས།། མཐོ་དམན་སྣང་ཚུལ་ཅིར་མ་བརྟགས།། ཟག་པའི་རང་བཞིན་སྦྲུལ་མིན་ཡང་།། འཁྲུལ
230b6 པས་སྦྲུལ་གྱི་ངོ་བོར་སྣང་།། དངོས་ལ་སྦྲུལ་དུ་མི་གནས་ཀྱང་།། འཁྲུལ་པའི་ངོ་ལ་སྣང་གཞི་ཡོད།། རང་གསལ་མ་བཅོས་ཇི་བཞིན་ལ།། རྟོག་དང་མི་རྟོག་མི་གནས་ཀྱང་།། འཁྲུལ་པས་གཉིས་སུ་རྟོག་པས
iiif viewer powered by OpenSeadragon
