| e-texts navigator |
| Wylie |
196a1 འོད་ལ་བཞག། རྩོལ་བསྒྲུབ་བྲལ་བའི་འབྲས་བུ་སྤྲད།། འདི་ལྟར་སྟོན་པའི་སློབ་དཔོན་ནི།། ལུས་སྲོག་དབང་པོ་ཤ་རུས་ཁྲག། བསྐལ་པར་བཏང་ཡང་མི་ཕངས་ན།། བུ་དང་ཆུང་མ་ནོར་གྱི
196a2 དབྱིག། བྲན་ཕོ་བྲན་མོ་སྨོས་ཅི་དགོས།། དམ་པ་རྒྱལ་བར་མི་འཛིན་ན།། དཔག་མེད་རྒྱུད་ལ་མཁས་གྱུར་ཀྱང་།། དེ་ཉིད་གཤེད་གྱུར་སྙིང་དྲལ་ནས།། ངེས་པར་རྡོ་རྗེའི་ཁབ་ཏུ་ལྷུང་།། མགྱོགས་འགྲོ་སོ་མཚམས
196a3 འདས་དང་འདྲ།། འཁོར་བའི་གཏིང་དུ་ལྟུང་གྱུར་ནས།། དམ་པ་དེ་ལ་མ་བརྟེན་པར།། ཐར་པའི་སྐབས་ནི་མི་སྲིད་དོ།། རྫོགས་ཆེན་རྣ་བརྒྱད་མན་ངག་ལ།། བླ་མའི་མན་ངག་མི་ལྡན་པས།། ལོག་རྟོག་ཤེས་པས
196a4 དཔྱད་པ་ནི།། ངེས་པར་ལྟུང་འགྱུར་ཐེ་ཚོམ་མེད།། རང་བཞིན་ངན་པའི་མི་རྣམས་དང་།། ཐོས་ཆུང་སྒྲ་ལ་གོམས་མེད་དང་།། ཐེག་པ་དམན་པའི་སྐྱེ་བོ་དང་།། རྡོ་རྗེ་སློབ་དཔོན་སྨོད་པ་དང་།། རྡོ་རྗེ་སྤུན་ལ་འཁུ་བ
196a5 དང་།། རང་གསལ་དོན་ལ་སྐུར་པ་དང་།། ཁེ་གྲགས་ཆེ་བའི་རྒྱུ་བསྒྲུབ་དང་།། ཆོས་ལ་དགག་སྒྲུབ་བྱེད་པ་དང་།། དོན་མེད་སྒྲ་ལ་གཉེར་བ་དང་།། དོན་མེད་སློབ་དཔོན་དབང་འདོད་ལ།། ནམ་མཁའི་མཐའ་དང
196a6 མཉམ་པའི་རྒྱུད།། ཡང་གསང་ཐུགས་ཀྱི་མན་ངག་འདི།། བཤད་ཅིང་ངེས་པར་བསྟན་བྱས་ན།། དམ་ཤོད་གླིང་གི་དུར་ཁྲོད་དུ།། ཌཱ་མ་རུ་ལ་འདུ་བ་ལྟར།། མཁའ་འགྲོ་རྣ་ཉན་འདུས་པ་ཡིས།། འཆི་བའི་དུས་མིན
iiif viewer powered by OpenSeadragon
