| e-texts navigator |
| Wylie |
193b1 བཞིན།། གཅིག་ལ་དགུ་ཡི་ཚུལ་དུ་སྣང་།། རིག་པ་ཀློང་གི་དོན་ལ་འདུས།། དཔག་མེད་དུས་གསུམ་རྒྱལ་བ་རྣམས།། མ་རྟོགས་དོན་ལ་དགོངས་པའི་ཕྱིར།། རྫོགས་ཆེན་གླེགས་བམ་ཚུལ་བཟུང་སྟེ།། གདུལ་བྱ་ཀུན
193b2 གྱི་མདུན་ན་གནས།། ཇི་ལྟར་འོད་དང་འོད་ཅན་ལྟར།། ཐུགས་རྗེ་ནམ་མཁའི་མཐའ་ལྟར་གདལ།། གཉིས་མེད་ཡེ་ཤེས་གཅིག་ལ་རྫོགས།། རེ་སྐོང་ཡིད་བཞིན་ནོར་བུའི་ཚུལ།། མཛོད་དགུ་རིག་པའི་གཏེར་ཆེན
193b3 ལ།། རིག་ཅན་དབང་ཐོབ་གང་ཟག་གིས།། བརྡ་དོན་འབྱེད་བཀྲོལ་རིམ་པ་འདིས།། དུས་གཅིག་འདོད་སྤྱོད་དགྱེས་པར་གྱུར།། ཇི་སྲིད་གང་དང་གང་སྣང་བ།། དེ་སྲིད་སེམས་ཀྱི་རྣམ་གྲངས་ཏེ།། གཅིག་གིས་ཀུན
193b4 གྲོལ་ཐོབ་པ་ནི།། འཕྲུལ་གྱི་སྐྱེས་བུའི་དཔེ་དང་མཚུངས།། འདོད་འབྱུང་རིན་ཆེན་ཕུང་པོ་ལྟར།། ཀུན་ལ་ཕྱོགས་རིས་མེད་པར་གསལ།། རིན་ཆེན་ཁང་པ་སྒོ་མང་བཞིན།། དོན་གཅིག་འཇུག་སྒོ་བསམ་མི
193b5 ཁྱབ།། ཅེས་གསུངས་སོ།། ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལས། མཛོད་དགུ་རིན་ཆེན་གཏེར་གྱི་ལེའུ་སྟེ་ལྔ་པའོ།། །། དེ་ནས་སེམས་དཔའ་རྡོ་རྗེས་རྡོ་རྗེ་སེམས་དཔའ་ཆེན་པོ་ལ་འདི་སྐད
193b6 ཅེས་གསོལ་ཏོ།། དུས་གསུམ་སངས་རྒྱས་ཐམས་ཅད་ཀྱི།། འདོད་འབྱུང་ནམ་མཁའ་མཛོད་ཀྱི་བདག། སྐུ་གསུང་ཐུགས་ཀྱི་དབྱིངས་ལ་རོལ།། འགྱུར་མེད་ངང་ལ་རྟག་ཏུ་བཞུགས།། མགོན་པོ་ཁྱོད་ལ་གསོལ་བ
iiif viewer powered by OpenSeadragon
