| e-texts navigator |
| Wylie |
193a1 རང་གསལ་གཟའ་གཏད་མེད།། ལྟ་བ་ཀུན་གཞིའི་རྩ་ཡིན་པས།། བལྟར་མེད་ཀུན་བྲལ་ཉག་གཅིག་པོ།། ལྟ་བ་ཀློང་ཡངས་མཉམ་པའི་མཛོད།། ཟིན་ཆགས་བྲལ་བའི་བདུད་རྩི་ལ།། གླང་ཆེན་ཆུར
193a2 ཞུགས་ལྟ་བུ་ཡི།། བབ་ཅོལ་རེ་དོགས་བྲལ་བ་ལ།། སྤང་ལེན་བྲལ་བ་སྤྱོད་པའི་མཛོད།། བསྐུར་མེད་རང་ཐོབ་དབང་གི་མཆོག། ལམ་དང་ས་ལ་མི་བགྲོད་དེ།། ཁྱུང་ཕྲུག་སྒོང་སྐྱེས་ཇི་བཞིན་པ།། རྒྱལ་ཐབས་སྤྱི
193a3 བླུགས་དབང་གི་མཛོད།། བྱར་མེད་གདོད་ནས་བྱས་ཟིན་ལ།། བྱ་མེད་རང་གསལ་ཕྲིན་ལས་འདི།། ཀུན་ཏུ་མ་ཡེངས་རང་གནས་པ།། ཕྲིན་ལས་ལྷུན་གྱིས་གྲུབ་པའི་མཛོད།། རང་གསལ་མ་བཅོས་དཀྱིལ་འཁོར
193a4 ལ།། མ་བསྐྱེད་གདོད་ནས་སྐུ་གསུང་ཐུགས།། རང་གསལ་མི་རྟོག་ཏིང་འཛིན་དང་།། བསྐྱེད་མེད་དཀྱིལ་འཁོར་ཆེན་པོའི་མཛོད།། མཁྱེན་པའི་ཡེ་ཤེས་རང་འཆར་ལ།། ཤེས་རབ་གསུམ་གྱི་ཚུལ་གྱིས་འཇུག། ཡེ
193a5 ཤེས་གསང་བའི་གཏེར་འཛིན་པས།། མ་བཅོས་རང་གསལ་ཡེ་ཤེས་མཛོད།། དགུར་སྣང་ཚིག་རྫོགས་ཁྱད་པར་ཆེ།། རིན་ཆེན་ཕུང་པོ་མཉམ་པའི་དབྱིངས།། རིན་ཆེན་མཛོད་སྒོ་ཀུན་ཕྱེ་བས།། རིན་ཆེན་དབྱིག་གི
193a6 གཏེར་དང་ཕྲད།། ཁྱབ་གདལ་ནམ་མཁའི་བྱིན་རླབས་ལས།། ཉི་མའི་འོད་ཀྱི་དཀྱིལ་འཁོར་ཤར།། རིག་པ་རང་བྱུང་ཉག་གཅིག་ལས།། གདུལ་དབང་བསམ་པའི་ཁྱད་པར་གྱིས།། མེ་གཅིག་སྐར་ཁུང་དུ་མ
iiif viewer powered by OpenSeadragon
