| e-texts navigator |
| Wylie |
168b1 གསུངས་སོ།། རྡོ་རྗེ་སེམས་དཔས་ཡང་ཞུས་པ།། ཀུན་རིག་སྟོན་པ་ཆོས་རྗེ་ལགས།། ཁྱོད་ནི་སྨྲ་བའི་སེང་གེ་སྟེ།། རྩོལ་མེད་ཐེག་པ་གསུང་དུ་གསོལ།། ཀུན་རིག་སྟོན་པས་བཀའ་སྩལ་པ།། རྡོ་རྗེ་སེམས་དཔའ་ལ
168b2 སོགས་ཉོན།། རྩོལ་མེད་ཐེག་པའི་ཡང་སྙིང་འདི།། བློ་དམན་གོ་བ་ཤིན་ཏུ་དཀའ།། འཛིན་པའི་སྤྱོད་ཡུལ་མ་ཡིན་པས།། ཐེག་པའི་ཡང་སྙིང་བླ་མེད་འདི།། རྡོ་རྗེ་སེམས་དཔས་ཐུགས་ལ་ཆོངས།། ཕྱི་རབས་བློ་ལྡན
168b3 རིགས་ཀྱི་བུ།། བསྟན་པའི་ཡང་སྙིང་དེ་ལ་སྟོན།། ཞེས་གསུངས་སོ།། རྡོ་རྗེ་སེམས་དཔས་ཡང་ཞུས་པ།། གསང་བའི་བདག་པོ་མཐུ་སྟོབས་ཅན།། རྩོལ་བྲལ་ཐེག་པའི་ཡང་རབ་དེ།། དེ་ཡི་རྟོགས་ཚུལ་ཇི་ལྟར
168b4 ལགས།། ཀུན་བཟང་སྟོན་པས་བཀའ་སྩལ་པ།། རྩོལ་བྲལ་ཐེག་པའི་རྟོགས་ཚུལ་དེ།། རང་བཞིན་དབང་པོ་རྣོན་པོ་ལ།། འཛིན་མེད་རང་བྱུང་དྲི་མ་མེད།། མ་འགགས་གཟུང་བའི་ཡུལ་ལྟར་སྣང་།། སྣ་ཚོགས་སྣང
168b5 བའི་རང་སྣང་ལ།། བཟང་ངན་མེད་པའི་ངོ་བོར་རྟོགས།། རྒྱུ་འབྲས་མེད་པའི་ཆོས་ཉིད་ལ།། དངོས་པོའི་རྒྱུ་འབྲས་གང་ཡང་མེད།། དོན་དམ་རྒྱུ་འབྲས་མེད་པར་རྟོགས།། སྣ་ཚོགས་རྒྱུ་འབྲས་དགག་མི་ནུས།། ཞེས
168b6 གསུངས་སོ།། རྡོ་རྗེ་སེམས་དཔས་ཡང་ཞུས་པ།། ངེས་དོན་ཐེག་པའི་ཡང་སྙིང་དེ།། བསླབ་པའི་ཡུལ་ནི་ཇི་ལྟར་ལགས།། བསླབ་པའི་ཡུལ་མིན་ཇི་ལྟར་ལགས།། བསླབ་པའི་ལུགས་ནི་ཇི་ལྟར་ལགས།། ཐམས་ཅད
iiif viewer powered by OpenSeadragon
