| e-texts navigator |
| Wylie |
146b1 བར་རྟོགས་པའི་འཁོར་འབའ་ཞིག་གཉིས་སུ་མེད་པར་འདུས་སོ།། དེ་ནས་བཅོམ་ལྡན་འདས་རིག་པ་རྩལ་གྱི་རྒྱལ་པོ་ཆེན་པོ་དེ་ལྷུན་གྲུབ་ཟག་མེད་བདེ་བ་ཆེན་པོ་འདུ་འབྲལ་མེད་པའི་ཏིང་ངེ་འཛིན་ལ་སྙོམས་པར
146b2 ཞུགས་སོ།། དེའི་ཚེ་དེའི་དུས་ན། ཉིད་ལས་མི་གཞན་པའི་འཁོར་ཐམས་ཅད་ལྷུན་གྲུབ་འགག་པ་མེད་པར་རང་གསལ་བར་གྱུར་ཏོ།། དེ་ནས་བཅོམ་ལྡན་འདས་རིག་པའི་རྒྱལ་པོས་འདི་སྐད་ཅེས་གསུངས་སོ།། ལྷུན
146b3 གྲུབ་འགག་མེད་བདེ་ཆེན་ལ། འཁོར་བ་མྱང་འདས་ཅིར་ཤར་བ།། རིག་པའི་རྩལ་ཡིན་གཞན་ན་མེད།། རྟོགས་པའི་འཁོར་ཚོགས་དང་སེམས་ཀྱིས།། ཅིར་སྣང་ལྷུན་གྲུབ་ཆེན་པོར་གསལ།། ཞེས་གསུངས་པ་དང་།།
146b4 རྟོགས་པ་རང་གསལ་གྱི་ནང་ནས་རྡོ་རྗེ་སེམས་དཔའ་རང་བཞེངས་ནས། འདི་སྐད་ཅེས་གསོལ་ཏོ།། ཀྱེ་ཀྱེ་རིག་པའི་རྩལ་ཤར་བཅོམ་ལྡན་འདས།། གབ་པའི་དབྱིངས་ནས་མངོན་ཕྱུང་སྟེ།། ཕྲིན་ལས་མཛད་པ་ཅིར
146b5 ཡང་སྟོན།། ཐུགས་རྗེའི་ཆོ་འཕྲུལ་རིས་དང་བྲལ།། ཐིག་ལེ་ཟག་མེད་ཀུན་ཏུ་བཟང་།། ཟང་ཐལ་ཆེན་པོའི་དབྱིངས་ཉིད་ལས།། རང་བྱུང་ཕྱོགས་མེད་རང་གྲོལ་གྱིས།། གའུ་རིག་པའི་མཐོངས་གསལ་ནས།། གསང
146b6 དུ་མེད་པའི་ཚིག་བརྗོད་ནས།། རྟོགས་པའི་འཁོར་ལ་བསྟན་དུ་གསོལ།། ཨེ་མ་ཧོ།། གསུང་དུ་གསོལ་ཞེས་ཞུས་སོ།། དེ་ནས་རིག་པའི་རྒྱལ་པོ་ཆེན་པོ་དེས།། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་པ།།
iiif viewer powered by OpenSeadragon
