| e-texts navigator |
| Wylie |
119a1 དང་།། སྒྲུབ་དང་སྒྲུབ་པ་ཆེན་པོར་བཏགས།། བསྙེན་པའི་ལས་ཞེས་བྱ་བ་ནི།། ཨ་ཏི་ཡོ་གའི་བྱང་ཆུབ་སེམས།། འཁོར་འདས་གཉིས་སུ་མེད་པའི་ཕྱིར།། སངས་རྒྱས་ས་ལ་ཡེ་ནས་བསྙེན།། རང་བྱུང
119a2 ཡེ་ཤེས་རང་ཤར་བས།། རྟོགས་པའི་ངང་ལ་ཡེ་ནས་བསྙེན།། སྐུ་གསུམ་མངོན་དུ་གྱུར་པས་ན།། གོ་འཕང་མཆོག་ལ་ཡེ་ནས་བསྙེན།། ཆོས་ལ་བླང་དོར་མི་བྱེད་པས།། མཉམ་པ་ཉིད་ལ་ཡེ་ནས་བསྙེན།། སྣང་སྟོང
119a3 རིས་སུ་མི་འཛིན་པས།། དབྱེར་མེད་པ་ལ་ཡེ་ནས་བསྙེན།། ངེས་པར་རྟོགས་ན་གཞན་མེད་པས།། དགོངས་པ་མཆོག་ལ་ཡེ་ནས་བསྙེན།། ཨ་ཏི་རང་བྱུང་བསྙེན་པ་ཡིན།། ཉེ་བསྙེན་ཞེས་སུ་བཏགས་པ་ནི།། བརྗོད
119a4 དུ་མེད་པའི་བཟླས་པ་ཡིས།། སྨྲར་མེད་ཀློང་དུ་ཉེ་བར་བསྙེན།། དམིགས་སུ་མེད་པའི་ཏིང་འཛིན་གྱིས།། གནས་སུ་མེད་ལ་ཉེ་བར་བསྙེན།། ཅིར་ཡང་འགྱུར་བའི་ཕྱག་རྒྱ་ཡིས།། འཛིན་ཆགས་མེད་ལ་ཉེ་བར
119a5 བསྙེན།། རང་ལུགས་ཆེན་པོའི་བྱིན་རླབས་ཀྱིས།། རྒྱུན་ཆད་མེད་ལ་ཉེ་བར་བསྙེན།། རོལ་པ་ཆེན་པོའི་ཆོ་འཕྲུལ་གྱིས།། མངོན་པར་མཐོང་བ་ཉེ་བར་བསྙེན།། མྱོང་བ་མེད་པའི་དྲོད་རྟགས་ཀྱིས།། འདོད་པ་མེད་པར
119a6 ཉེ་བར་བསྙེན།། ཨ་ཏི་རང་བྱུང་ཉེ་བསྙེན་ཡིན།། སྒྲུབ་པ་ཞེས་སུ་བཏགས་པ་ནི།། རང་བྱུང་ཡེ་ཤེས་དཀྱིལ་འཁོར་དུ།། རང་སྣང་རོལ་པའི་ལྷ་བཀོད་དེ།། རྒྱུ་རྐྱེན་མེད་པའི་རྫས་བསོགས་ནས།། གཞི་རྩ་མེད་པར
iiif viewer powered by OpenSeadragon
