| e-texts navigator |
| Wylie |
113b1 ན་དབང་ཞེས་བྱ།། གསང་བར་བཞག་པའི་རྒྱུ་མཚན་ནི།། དངོས་སུ་མི་སྣང་ནུས་པའི་མཐུ།། དེ་བཞིན་གཤེགས་པ་ཐམས་ཅད་ཀྱང་།། རང་ལས་བྱུང་ཞིང་སྐྱེད་པར་བྱེད།། བློ་ཆུང་ཐེག་པ་དམན་པ་ལ།། དེ་དོན
113b2 བསྟན་ན་སྐྲག་པ་དང་།། སྒྱིད་ལུག་པ་ཡི་ཉེན་ཡོད་པས།། གསང་ན་འགྲུབ་པ་ཡིན་པའི་ཕྱིར།། གསང་དབང་ཞེས་སུ་བསྟན་པ་ཡིན།། ཞེས་གསུངས་སོ།། ཀློང་ཆེན་རབ་འབྱམས་རྒྱལ་པོའི་རྒྱུད་ལས། དབང་གི་བྱེ
113b3 བྲག་བསྟན་པའི་ལེའུ་སྟེ་སུམ་ཅུ་རྩ་བདུན་པའོ།། །། དེ་ནས་ཡང་སྟོན་པ་བཅོམ་ལྡན་འདས་ཀྱིས་ཉིད་ལས་མི་གཞན་པའི་འཁོར་རྣམས་ལ་བཀའ་སྩལ་པ། བྱང་ཆུབ་སེམས་ནི་སྐྱོན་དང་བྲལ།། ཆོས
113b4 རྣམས་ཐམས་ཅད་བསླབ་པ་སྟེ།། བསླབ་ཏུ་མེད་པའི་བསླབ་པ་དང་།། བསླབ་ཏུ་ཡོད་པའི་བསླབ་པའོ།། བྱང་ཆུབ་སེམས་ལ་སྐྱོན་མེད་ཀྱང་།། འདུལ་བྱེད་དབང་གིས་ཐབས་སྣ་ཚོགས།། དུས་གསུམ་སངས་རྒྱས
113b5 རྣམས་ཀྱིས་གསུངས།། མན་ངག་དོན་གྱི་གཏེར་ཆེན་ཡིན།། དམ་ཚིག་དམ་ཚིག་ཅེས་བྱ་བ།། གུད་ན་ཡོད་པ་མ་ཡིན་ཏེ།། རང་གི་ལྟ་བ་དམ་ཚིག་ཡིན།། ཇི་སྲིད་སྣང་གྲག་ཆོས་རྣམས་ཀུན།། རང་གི་སེམས་སུ་འདུས
113b6 པའི་ཕྱིར།། དེ་ལས་མི་འདའ་རང་དབང་ཐོབ།། འདས་ཉམས་མེད་པར་ཤེས་པའི་ཚེ།། ཇི་ལྟར་དམིགས་པ་བཞིན་དུ་སྣང་།། ཐམས་ཅད་མ་ལུས་ཀུན་གྱི་ཡང་།། གཞིའམ་རྒྱུ་རུ་གྱུར་པས་ན།། རང་གི་བྱང་ཆུབ་སེམས
iiif viewer powered by OpenSeadragon
