| e-texts navigator |
| Wylie |
341b1 ཡང་ཞུས་པ། ཀྱེ་ཀྱེ་བཅོམ་ལྡན་ཁྲོ་གཉེར་ཅན།། སེམས་སུ་དབྱེ་བ་ཇི་ལྟར་དབྱེ།། ཡེ་ཤེས་ཞེས་ནི་གང་ལ་བགྱི།། ཞེས་ཞུས་སོ།། བཀའ་སྩལ་པ། ངས་བསྟན་ཡིད་ལ་ངེས་ཟུང་ཞིག། ངོ་བོ་དཔེ་དང་རྣམ་གྲངས
341b2 དང་།། གནས་དང་ལམ་དང་སྒོ་དང་ནི།། སྐྱོན་དང་ཡོན་ཏན་འབྲས་བུའོ།། ཕྱེད་ཚད་དབྱེ་བའི་དུས་བསྟན་པའོ།། སེམས་ཀྱི་མཚན་ཉིད་བསྟན་པ་ནི།། རླུང་ཅན་དག་ཏུ་རྩལ་འགྱུས་ཏེ།། དབུགས་ནི་བརྙན་མ་དག།
341b3 དང་འདྲེས།། རིག་པ་རྐྱེན་དང་ཕྲད་པ་ཡིས།། གཟུང་འཛིན་རྟོག་པ་ཆེར་སོང་ངོ་།། དེ་ལ་སེམས་ཞེས་བྱ་བ་ནི།། དབྱེ་བ་རྣམ་པ་གསུམ་ཡིན་ཏེ།། དོན་ལ་སེམས་པ་སྣ་ཚོགས་པ།། གསོག་པའི་ཕྱིར་ཡང་སེམས་ཞེས
341b4 བྱ།། ངོ་བོ་དབུགས་ནི་བརྙན་མས་ཏེ།། ཡེ་ནས་མེད་དེ་འཕྲལ་ལ་བྱུང་།། དཔེར་ན་ཚོང་དུས་འོ་མ་བཞིན།། ཇེ་ལད་ཇེ་ལད་སོང་བའོ།། གྲངས་ནི་རྣམ་པ་བརྒྱད་དུ་བསྟན།། གནས་ནི་རླུང་ཅན་གྲོང་ན་གནས།། ལམ
341b5 ནི་མགྲིན་པ་དག་ཏུ་རྒྱུ།། སྒོ་ནི་འདོད་པའི་སྒོ་གསུམ་ཤར།། སྐྱོན་ནི་རྟོག་པ་སྣ་ཚོགས་བྱེད།། འབྲས་བུ་བག་ཆགས་ཕུང་པོ་ལེན།། ཕྱེད་པའི་ཚད་ནི་རྒྱུ་སྲང་ཚད།། དབྱེ་བའི་དུས་ནི་ཕུང་པོ་བོར།། ཞེས
341b6 གསུངས་སོ།། ཡང་གསུངས་པ། ཡེ་ཤེས་ཞེས་བྱ་བསྟན་པ་ནི།། དབྱེ་བ་རྣམ་གྲངས་ངེས་ཚིག་དང་།། ངོ་བོ་གནས་དང་ལམ་དང་སྒོ།། ལས་དང་ཡོན་ཏན་འབྲས་བུ་དང་།། བྱེད་ཚད་དབྱེ་བའི་དུས་བསྟན་ནོ།། དབྱེ་བ
iiif viewer powered by OpenSeadragon
