| e-texts navigator |
| Wylie |
23b1 ཅད་མཐོང་བར་འགྱུར་རོ།། རིག་པའི་སྐུའི་སྣང་བ་ཐམས་ཅད་རང་སར་གྲོལ་ཞིང་། རང་སར་གནས་རང་ས་ལས་གཞན་དུ་མ་གཡོས་པ་ཉིད་དོ།། སངས་རྒྱས་ཀྱི་ཡེ་ཤེས་ཀུན་ཏུ་སྣང་ཞིང་། གཞི་སྣང་ཆེན་པོ་ལས་མ
23b2 བསྐྱོད་པའོ།། རིག་པ་ཅོག་བཞག་ནི་བལྟ་བ་ཀུན་གྱི་བཅུད་ཕྱུང་བའོ།། དེ་ཡང་མིག་གི་དེ་བཞིན་ཉིད་ཀྱི་འདུག་སྟངས་ལ་གནས་པར་བྱའོ།། ཞེས་ནོར་བུ་ཕྲ་བཀོད་ཆེན་པོའི་རྒྱུད་ལས། ཤིན་ཏུ་གསང་བའི་གདམས
23b3 ངག་གི་ལེའུ་སྟེ་བདུན་པའོ།། །། དེ་ནས་ཡང་འཁོར་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསལ་ཏོ།། ཀྱེ་ཀྱེ་བཅོམ་ལྡན་རྡོ་རྗེ་འཆང་།། གསང་སྔགས་གསང་བའི་གདམས་ངག་འདི།། བསྟན་པའི
23b4 སྣོད་ནི་གང་གང་ལགས།། བསྟན་དུ་མི་རུང་གང་དག་ལགས།། དཔའ་བོ་ཆེན་པོས་བཀའ་སྩོལ་ཅིག། དེ་ནས་རྡོ་རྗེ་འཆང་ཆེན་དེས།། འདི་སྐད་རབ་ཏུ་བཀའ་སྩལ་ཏོ།། ཀྱེ་མ་ཉོན་ཅིག་ལྷ་མོའི་རིགས།། ངས་བསྟན
23b5 ལེགས་པར་ཡིད་ལ་བཟུང་།། སྣང་བའི་དཀྱིལ་འཁོར་ཆེན་པོ་འདི།། ཀུན་ལ་བསྟན་པ་མ་ཡིན་ཏེ།། གསང་བ་ཐུབ་པ་འགའ་ལ་བསྟན།། གསང་སྔགས་གསང་བའི་གདམས་པ་འདི།། བསྟན་པའི་རིགས་ནི་འདི་ལྟ
23b6 སྟེ།། གསང་བ་གཉེར་གཏད་ཐུབ་པར་བྱེད།། གསང་བའི་དོན་ལ་འགྲུས་པ་དང་།། ཤེས་རབ་བློ་རྩལ་ཆེ་བ་དང་།། དམ་ཚིག་སྡོམ་པ་ལྡན་ལ་བསྟན།། དེ་ནས་ཁྱད་པར་འཁོར་རྣམས་ཀྱིས།། རྡོ་རྗེ་འཆང་ལ་ཡང་ཞུས
iiif viewer powered by OpenSeadragon
