| e-texts navigator |
| Wylie |
19b1 འགྱུར།། མུན་པའི་ཕྱོགས་ཉིད་ཐམས་ཅད་ཀུན།། སྒྲོན་མ་འབར་བ་གཅིག་གམ་ནི།། ཤེས་རབ་དག་པའི་སྐུ་གཅིག་གིས།། ཐམས་ཅད་མ་ལུས་སེལ་བར་འགྱུར།། ཆོས་ཉིད་རང་གི་ངོ་བོ་ནི།། གནས་ལུགས་རྣམ་པ
19b2 གསུམ་ལ་ཐུག། ཐུགས་ཀྱི་དགོངས་པ་རྩེ་གཅིག་ཀྱང་།། བྱུང་ས་ཆེན་པོ་གཅིག་ལ་ཐུག། དོན་གྱི་ཡེ་ཤེས་ཆེན་པོ་ཡང་།། བསྐུལ་ས་ཆེན་པོ་གཉིས་ལ་ཐུག། དྲི་མེད་རང་སྣང་ཆོས་སྐུ་ཡང་།། ཤར་ས་ཆེན་པོ་གསུམ
19b3 ལ་ཐུག། འཛིན་ཆགས་བྲལ་བའི་རང་གདངས་ཀྱང་།། སྟོང་པ་ཆེན་པོའི་ལམ་ལ་ཐུག། རྡོ་རྗེ་སེམས་དཔའི་གསང་དོན་ཡང་།། དྲི་མ་དག་པ་གཅིག་ལ་ཐུག། རང་བཞིན་དག་པའི་ཆོས་སྐུ་ཡང་།། ཆགས་བྲལ་འབྲས
19b4 བུ་ལྔ་ལ་ཐུག། དངོས་ལས་འདས་པའི་ཐིག་ལེ་ཉག་གཅིག་ཀྱང་།། ཆོས་སྐུའི་གནས་ས་གསུམ་ལ་ཐུག། ཡེ་ནས་གནས་པའི་རང་གསལ་ཡང་།། བཅུད་ཀྱི་སྙིང་པོ་གསུམ་ལ་ཐུག། རང་རིག་གསལ་བའི་སྒྲོན་མ
19b5 ཡང་།། ལྟ་སྟངས་ཆེན་པོ་གསུམ་ལ་ཟུག། གསང་བའི་ཡེ་ཤེས་རྣམ་ལྔ་ཡང་།། རྡོ་རྗེ་གསང་བའི་ཚིག་ལ་ཟུག། གསང་བའི་ཆོས་སྐུ་ཆེན་པོ་ཡང་།། ཆོས་སྐུའི་སྣང་བ་གཉིས་ལ་ཟུག། རྟགས་ཀྱི་ཡེ་ཤེས་ཚོན་གང
19b6 ཡང་།། རང་བྱུང་བསྟན་པ་གཅིག་ལ་ཐུག། སངས་རྒྱས་དགོངས་པ་རང་གནས་དེ་བཞིན་ནོ།། ཨེ་མ་ཧོ།། རྒྱུ་རྐྱེན་བྲལ་བའི་སྐད་ཅིག་མ།། དེ་མ་ཐག་ཏུ་རང་ལས་བྱུང་།། མཚོན་པའི་ཡེ་ཤེས་ངོ་བོ་ཡང་།། འབྱུང་བའི
iiif viewer powered by OpenSeadragon
