| e-texts navigator |
| Wylie |
187b1 ལ་རྩོད་དུ་མེད་དོ།། ལོག་ལྟ་ཅན་ངའི་དེ་བཞིན་ཉིད་ལ་རྩོད་པ་ནི། སེང་གེ་དང་ཝའི་ཚུལ་ཏེ་དེ་ནི་མ་ཡིན་ནོ།། རིགས་ཀྱི་བུ་གང་ཞིག་ང་ལ་རྩོད་དུ་ཡོད་པ་ནི་ཚིག་ཏུ་སྨྲ་བ་མ་ཡིན་ཏེ། ཚུལ་ལ་བརྟག་པ་རབ་ཏུ
187b2 གསུངས་པའོ།། དོན་དེ་བཞིན་ཉིད་ལ་གནས་པའི་བྱང་ཆུབ་སེམས་དཔའ་ནི་རབ་ཏུ་དཀའོ།། ཞེས་ཆོས་ཉིད་ཞི་བ་ལས་བཀའ་སྩལ་ཏོ།། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོས། ཐུགས་ཆོས་ཉིད
187b3 མཉམ་པ་ལས་མ་གཡོས་ཀྱང་། སྐུ་འབར་བའི་ཆ་ལུགས་སུ་བསྟན་ནས། མུ་སྟེགས་ལོག་ལྟ་ཅན་ཚར་གཅོད་པའི་ཕྱིར། ང་རྒྱལ་གྱི་གདངས་ཀྱིས་བདུད་དཔུང་ཟིལ་གྱིས་གནན་ཕྱིར།། འདི་སྐད་ཅེས་སྨྲས་སོ།། དུར
187b4 ཁྲོད་ཆེན་པོ་རོ་ཡི་གླིང་།། ཀེང་རུས་ཆེན་པོ་གསར་རྙིང་དབུས།། ཅེ་སྤྱང་དང་ནི་གང་ཀ་དང་།། ལིང་དུའི་ཚོགས་ཀྱིས་བསྐོར་བའི་གནས།། གཉེན་པོས་མི་ཤིགས་གཞལ་ཡས་ནས།། བཅོམ་ལྡན་ཟ་བྱེད་ཧེ་རུ
187b5 ཀ། ཞལ་གསུམ་ཕྱག་དྲུག་སྐུ་མདོག་མཐིང་།། ཞབས་བཞི་བགྲད་པས་བདུད་བཞི་འཇོམས།། རྟག་པར་གཞོན་ནུའི་ཚུལ་དུ་བཞུགས།། བརྗིད་པའི་ཁྲོ་གཉེར་གྱེན་དུ་བཟློག། འགྱུར་མེད་སྤྱན་དགུ་རབ་ཏུ
187b6 བགྲད།། ཟ་བྱེད་མཆེ་བ་གཙིགས་པ་ཡིས།། འཁོར་བའི་སྐྱེ་ཤི་རྩད་ནས་གཅོད།། དབུ་སྐྲ་ཐོར་ཚུགས་གཅིག་ཏུ་འཁྱིལ།། ཧ་ཧ་རུ་ལུའི་སྒྲ་བསྒྲགས་པས། ཁམས་གསུམ་མ་ལུས་དབང་དུ་སྡུད།། ཕྱག་དྲུག་མཚོན་ཆ
iiif viewer powered by OpenSeadragon
