| e-texts navigator |
| Wylie |
166b1 མ་ཐག་ཏུ་ཡེ་ཤེས་སྐྱེའོ།། ལུང་བསྟན་རྐྱེན་གྱིས་འཁྲུལ་པ་བཟློག། འཁྲུལ་པ་ལོག་ན་ཡེ་ཤེས་སྐྱེ། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་མདོ་སྡེ་དང་ཀྲི་ཡ་དང་ཨུ་པ་ཡ་དང་། ཡོ་གའི་དོན་དང་།
166b2 མ་ཧཱ་དང་། ཨ་ནུའི་ཐེག་པ་བརྒྱད་ཀྱི་ལྷ་སྒོམ་ལས་ཁྱད་པར་དུ་གྱུར་པ། ཨ་ཏིས་གནས་ལུགས་ཆོས་སྐུ་སྟོན། ལྷའི་བུའི་བདུད་བཅོམ་མོ།། ཐིག་ལེ་རྟོགས་པའི་ལམ་ནི། ལམ་ལ་གནས་པ། ལམ་གྱི་སྟོབས། ལམ་གྱི
166b3 འབྲས་བུ་ནི། ཆོས་ཀྱི་སྐུ་ཡེ་ཤེས་རང་སྣང་དང་། ལོངས་སྐུ་རིགས་ལྔ། སྦྲུལ་སྐུ་ཐུབ་པ་དྲུག་གིས་ནི། འཆི་བདག་གི་བདུད་བཅོམ་མོ།། ནང་རིག་པ་ཆོས་ཀྱི་སྐུ་དཔེའི་སྒོ་ནས་དོན་མཚོན་པར་བྱ་སྟེ། དེ་ཡང་ཕྱོགས་ཀྱི
166b4 ཆོས་དྲུག་གཉིས་ཀྱིས་བསྟན་ཏེ། ནམ་མཁའ་རྡོ་རྗེ་ཨ་དང་གསུམ།། པདྨ་ཉི་མ་རྒྱ་མཚོའི་འཇིང་།། རི་བོ་སེང་གེ་གླང་པོ་ཆེ།། བྱ་རྒོད་ཐི་བ་འཕུར་སྐྱེན་གསུམ། ཡོན་ཏན་སོ་སོའི་དཔེ་རུ་བསྟན།། དེ་ལྟར་དཔེའི་སྒོ་ནས
166b5 རིག་པ་ཆོས་ཀྱི་སྐུ་རྟོགས་པས། ཉོན་མོངས་པའི་སྒྲིབ་པ་བསལ་ཏེ། ལྟ་བ་རྣམ་རྟོག་ཡེ་ཤེས་སུ་ལྡན་པ་ཞེས་བྱའོ།། དེ་ལྟར་ནང་རིག་པ་ཆོས་ཀྱི་སྐུ་ཡིན་ཕན་ཆད། ཡུལ་ཆོས་ཀྱི་སྐུའི་སྣང་བ་སྟེ། དཔེར་ན་ཉི་མ་ལས
166b6 འོད་དང་། ཡིད་བཞིན་ནོར་བུ་ལས་དགོས་འདོད་དང་། རྒྱ་མཚོ་ལས་རླབས་བཞིན་ཆོས་ཀྱི་སྐུ་དངོས་པོ་དང་ཁ་དོག་དང་། དབྱིབས་སུ་མ་གྲུབ་པའི་ཕྱིར་རོ།། རིག་པའི་རྒྱུད་ལས། ཡུལ་ནི་སྣང་ལ་རང་བཞིན་མེད
iiif viewer powered by OpenSeadragon
