| e-texts navigator |
| Wylie |
163b1 རྟོགས་སྒྱུ་མའི་རང་བཞིན་རྣམ་རྟོག་ཅིར་མི་བསམ། བསམ་པ་ཀུན་སྤངས་ཡེ་ཤེས་མཚོ་མི་གཡོ། དེའི་ངང་ལས་མ་བསྐྱོད་ལྷན་ནེ་ཞོག། ལྷན་ནེ་ལྷང་ངེར་བཞག་ན་མཉམ་པ་ཆེན་པོ་ཡིན། ལུས་མི་བསྐྱོད། ངག་མི
163b2 བརྗོད། སེམས་སྒོ་དྲུག་འཁྲུལ་པ་ཡུལ་ལས་འདས་ནས། ཡུལ་སྤྲོས་པ་དང་བྲལ་བ་ནི་བསྒོམ་པའི་དོན་ཏོ།། ལྟ་བ་ཀུན་ཏུ་བཟང་པོ་ཁམས་གསུམ་ཐིག་ལེར་བཏབ།། སྤྱོད་པ་ཀུན་ཏུ་བཟང་པོ་འཁོར་བ
163b3 བདེ་བར་སྤྱོད།། དམ་ཚིག་ཀུན་ཏུ་བཟང་པོ་ཡེ་སྲུངས་གདེངས་དང་ལྡན།། ཕྲིན་ལས་ཀུན་ཏུ་བཟང་པོ་མ་བཙལ་ལྷུན་གྱིས་གྲུབ།། མདོ་དྲུག་ལ། ངོ་བོ་ཉིད་ཆོས་ཀྱི་སྐུ་དང་། ཡེ་ཤེས་ཆོས་ཀྱི་སྐུ་དང་། གནས་ལུགས
163b4 དང་། སྣང་ལུགས་དང་། ཆོས་ཀྱི་མཐར་གཏུགས་པ་དང་། མན་ངག་གི་ཀློང་རྡོལ་བའོ།། མན་ངག་ཀློང་རྡོལ་བ་ལ་གཉིས་ཏེ། ཡོན་ཏན་གྱི་སྐུའི་ཀློང་རྡོལ་བ་དང་། མན་ངག་གི་མདོ་དྲུག་གིས་ཡེ་ཤེས་ཀྱི་མ་བུ་སྤྲད
163b5 དོ།། དང་པོ་འཁོར་བ་ཐོག་མ་མེད་པའི་གནས་ལུགས་ནས། གསེར་མིག་དབུས་སུ་རྫོགས་པར་བསྟན་པ་ནི། གསེར་མིག་ཁོ་ན་སྨྲ་བའི་ཚིག་གོ། རིན་ཆེན་གསེར་དང་འདྲ་སྟེ་ཀུན་ལ་དཀོན། ཡེ་ཤེས་མིག་དང་རྟག་ཏུ
163b6 འགྲོགས་ཏེ། དེ་ཕྱིར་གསེར་མིག་ཞེས་ཀྱང་དེ་ལ་བྱ། པདྨ་འཁྱིལ་པའི་རྒྱུད་ལས། རིན་པོ་ཆེ་གསེར་མིག་གི་མན་ངག་བསྟན་པའི་ལེའུ་སྟེ་གཉིས་པའོ།། །། དེ་ནས་འཁོར་བའི་གྲུབ་ཚུལ་འདི་དག་བཀའ་སྩལ་ཏེ།
iiif viewer powered by OpenSeadragon
