| e-texts navigator |
| Wylie |
144b1 གྱིས།། ལོག་པར་བལྟ་བ་སུན་ཕྱུང་བས། སེང་གེ་འགྱིངས་པའི་དགོངས་པ་ཡིན། དེ་བཞིན་འཆད་མཁན་ང་ཉིད་ཀྱང་།། སྐུ་གསུམ་འདུ་འབྲལ་མེད་པར་གནས།། དེ་ཡི་དོན་ཆེན་ཡང་དག་མཚན།། རྩོལ་བ་མེད་པར
144b2 རང་ལ་རྫོགས།། འཁོར་རྣམས་ལ་ཡང་དེ་བཞིན་ནོ།། མཚན་རྫོགས་དོན་གྱི་དགོངས་པ་ཡིན།། དེ་ཡི་དགོངས་པ་ཡོངས་རྫོགས་པ།། ཆོས་ཉིད་ཀློང་ན་ཆོས་སྐུ་གནས།། གཉིས་མེད་ཟང་ཐལ་སྟོང་པ་ཉིད།། དེ་ཡི་ངང
144b3 ན་ཡེ་ཤེས་ལྔ།། དེ་ཡི་ངང་ལ་སྐུ་ལྔར་བཞུགས།། སྐུ་གསུང་ཐུགས་ཀྱི་རྡོ་རྗེ་བདག། སྟོང་མཐུན་མ་གཞིའི་དགོངས་པ་ཡིན།། དེ་ལ་ཡོན་ཏན་མི་འགག་པས།། རིན་ཆེན་གཏེར་གྱི་འབྱུང་གནས་སོ།། ང་ཡིས་དེ་བཞིན
144b4 བསྟན་པ་ཡིས།། སྐུ་དང་ཡེ་ཤེས་མ་རིག་སེལ།། ཞེས་གསུངས་སོ།། ཐིག་ལེ་ཀུན་འདུས་ཆེན་པོའི་རྒྱུད་ལས།། སྐུའི་རྒྱུད་ཀྱི་དོན་བསྟན་པའི་ལེའུ་སྟེ་གཉིས་པའོ།། །། བནྟ་ཏནྟ་ས་མ་ཏི་ཨཱ་ཏ་ཀ་ལ་པཱ་རུ་ན
144b5 ཨཱ།། དེ་ནས་བཅོམ་ལྡན་འདས་གསུང་འགག་པ་མེད་པའི་ཏིང་ངེ་འཛིན་ལ་ཞུགས་སོ།། དེའི་ཚེ་གསང་བའི་བདག་པོས་ཞུས་པ། ཀྱེ་བཅོམ་ལྡན་འདས་གསུང་གི་དགོངས་པ་གསུང་དུ་གསོལ།། ཞེས་ཞུས་སོ།། སྟོན
144b6 པས་བཀའ་སྩལ་པ།། གསང་བའི་བདག་པོ་ངེས་པར་ཟུང་ཞིག། གཞི་ནི་འགྱུར་བ་མེད་པ་ལས།། ཡེ་ཤེས་འགག་པ་མེད་པར་འཆར་བར་གསུངས་པ་ནི།། གཞིའི་མཚན་ཉིད་སྟོང་ཞིང་བདག་མེད་ལ།། དོན་འགྱུར་བ
iiif viewer powered by OpenSeadragon
