| e-texts navigator |
| Wylie |
309a1 རྟོགས།། སྲིད་པ་གསུམ་ཉིད་སངས་རྒྱས་ཞིང་།། གཉིས་མེད་ལྟ་བའི་རང་ལུགས་ཡིན།། བྱ་བཙལ་བྲལ་ནས་དབྱིངས་ལ་སྤྱོད།། འཛིན་ཆགས་མེད་པར་རང་སྣང་བའོ།། ཞེས་སེང་གེ་རྩལ་རྫོགས་ཆེན
309a2 པོའི་རྒྱུད་ལས། སེང་གེས་རང་སྐད་སྨྲས་པའི་ལེའུ་སྟེ་གསུམ་པའོ།། །། དེ་ནས་རིག་པ་ཀུན་ཏུ་བཟང་པོ་དང་།། ཡུམ་ཀུན་ཏུ་བཟང་མོ་གཉིས་སུ་མེད་པར་སྙོམས་པར་ཞུགས་སོ།། དེ་ནས་རིགས་ཀྱི་སངས
309a3 རྒྱས་ཀུན་རིག་ཆོས་ཀྱི་རྗེས་འདི་སྐད་ཅེས་ཞུ་བ་ཞུས་སོ།། ཨེ་མ་བདེ་གཤེགས་ཀུན་བཟང་ཡབ།། ཆོས་ཉིད་གཉིས་མེད་དོན་བརྗོད་པའི།། ཐབས་དང་ཤེས་རབ་གསུང་དུ་གསོལ།། དེ་ནས་ཆོས་ཉིད་སྟོང་པ
309a4 ཡིས།། ཡབ་ཡུམ་གཉིས་མེད་དོན་སྦྱར་ནས།། སངས་རྒྱས་རྣམས་ལ་བཀའ་སྩལ་པ།། ཀྱེ་མ་རིགས་ཀྱི་སངས་རྒྱས་ཉོན།། ཡུལ་སེམས་གཉིས་མེད་དགོངས་པ་འམ།། དབྱིངས་དང་རིག་པ་གཉིས་མེད་ནི།། ཡབ་ཡུམ
309a5 གཉིས་མེད་ཚུལ་དུ་གནས།། ཆོས་ཉིད་ཡངས་པའི་ཕོ་བྲང་དུ།། རྟོག་མེད་གསལ་བའི་ཡེ་ཤེས་འདུ།། ཕྱི་ཡི་ཆོས་ནི་སྣང་བ་ལ།། ནང་གི་ཆོས་ནི་འཛིན་པར་བཤད།། འགྱུར་མེད་ཀུན་ཏུ་བཟང་པོ་ངས།། ཆོས་ཉིད་རང
309a6 སྣང་ལྟ་བ་བཤད།། བཤད་པས་རྟོག་པའི་ཐེ་ཚོམ་ཆོད།། བག་ཆགས་བྲལ་བའི་ཀུན་གཞི་ལ།། གཟུང་འཛིན་བྲལ་བའི་རིག་པ་གསལ།། གསང་སྔགས་རིག་པ་ཅོག་གཞག་ནི།། ལྷ་སྒོམ་སྤྱོད་པའི་མདོར་བསྡུས
iiif viewer powered by OpenSeadragon
