| e-texts navigator |
| Wylie |
244b1 སྐལ་བ་མཉམ་པའོ།། ཞེས་ཀུན་ཏུ་བཟང་པོ་ཀློང་དྲུག་པ་གསང་བ་ཆེན་པོའི་རྒྱུད་ལས། སྙིང་པོ་ལམ་དང་བཅས་པ་འབྲས་བུ་རང་དྲིལ་བར་བསྟན་པའི་ཀློང་ཞེས་བྱ་སྟེ་ལྔ་པ་རྫོགས་སོ།། །། ཡི་དྭགས་ཀྱི་སྐྱེ
244b2 གནས་དག་པར་བྱེད་པའི་སྐབས་ཏེ་ལྔ་པའོ།། །། གའི་ཐ་བྷ། ཐ་ཐམཿ།། དེ་ནས་སྟོན་པ་ཀུན་ཏུ་བཟང་པོས་རང་གིས་འཁོར་རྣམས་སྡུད་པའི་ཆེད་དུ། ཞལ་གྱི་སྒོ་རྣམས་ནས་འོད་ཟེར་ཁ་དོག་དུ་མ་བྱུང་སྟེ། སངས
244b3 རྒྱས་ཀྱི་ཞིང་ཁམས་རྣམས་སྣང་བར་བྱས་པ་ནི་འདི་ལྟ་སྟེ། འོད་ཟེར་དཀར་པོ་དང་ཁ་དོག་རགས་པ་རབ་ཏུ་དཀར་པོ་དང་། ཕྲ་བ་ཤིན་ཏུ་དཀར་བར་སྣང་བ་དང་། མ་འདྲེས་པ་མཆོག་ཏུ་དཀར་བ་རྩི་བསལ་སྣང་བ་དང་། ཚད
244b4 མེད་པར་དཀར་བར་སྣང་ཟླུམ་པོ་བ་དང་།། དེ་བཞིན་དུ་དམར་པོ་དང་། རབ་ཏུ་དམར་པོ་དང་། ཤིན་ཏུ་དམར་པོ་དང་། མཆོག་ཏུ་དམར་པོ་དང་། ཚད་མེད་པའི་དམར་པོའོ།། ཡང་སེར་པོ་དང་། རབ་ཏུ་སེར་པོ་དང་།
244b5 ཤིན་ཏུ་སེར་པོ་དང་། མཆོག་ཏུ་སེར་པོ་དང་། ཚད་མེད་པའི་སེར་པོའོ།། མཐིང་ག་དང་། རབ་ཏུ་མཐིང་ག་དང་། ཤིན་ཏུ་མཐིང་ག་དང་། མཆོག་ཏུ་མཐིང་ག་དང་། ཚད་མེད་པའི་མཐིང་གའོ།། དེ་བཞིན་ཏུ་ལྗང་གུ
244b6 དང་། རབ་ཏུ་ལྗང་གུ་དང་། ཤིན་ཏུ་ལྗང་གུ་དང་། མཆོག་ཏུ་ལྗང་གུ་དང་། ཚད་མེད་པའི་ལྗང་གུ་རྣམས་སྤྲོས་སོ།། གཞན་ཡང་ཤེལ་གྱི་ཁ་དོག་ལྟ་བུ་དང་། དངུལ་གྱི་ཁ་དོག་ལྟ་བུ་དང་། མུ་ཏིག་གི་ཁ་དོག་ལྟ་བུ་དང་།
iiif viewer powered by OpenSeadragon
