| e-texts navigator |
| Wylie |
16a1 ཐབས་ཀྱི་འཁོར།། སྐུ་དང་ཡེ་ཤེས་ཤེས་རབ་རླུང་།། མི་ཕྱེད་སྣ་ཚོགས་དམིགས་མེད་པས།། རྩ་རླུང་ཐབས་ཀྱི་བདེ་ཆེན་ཆོས།། སོ་སོའི་ཉམས་དང་མཐུན་པར་བཤད།། འདས་དང་མ་འོངས་ད་ལྟར
16a2 མེད།། མ་ཕྱེད་འབྱེད་པ་ཡོངས་སུ་མེད།། ཐམས་ཅད་རང་བྱུང་ཡེ་ཤེས་སོ།། ཐུན་མོང་གི་གླེང་གཞི་བཀོད་པ། འདི་སྐད་བདག་གིས་ཐོས་པའི་དུས་གཅིག་ན།། དགའ་དང་ལྡན་པ་བསོད་ནམས་བརྩེགས།། འགྲོ་བ་རྣམས
16a3 ཀྱི་ཐོག་མའི་ཡུལ།། ས་དང་ཆུ་དང་མེ་རླུང་གི། འབྱུང་བ་ཆེན་པོ་བཞི་མི་སྣང་།། ཤ་ཁྲག་བཀོད་པའི་གཟུགས་མེད་པའི།། རང་སྣང་དག་པ་ཆེན་པོའི་ཡུལ།། རབ་ཏུ་མཛེས་ཤིང་རྒྱས་པ་ཡི།། པདྨའི་ཟེའུ་འབྲུ་རྫོགས
16a4 པའི་གྲངས།། སྟོང་དང་ལྡན་པ་དབུས་མའི་གནས།། ཡོན་ཏན་ཐམས་ཅད་རྫོགས་པ་ཡི།། རྐྱེན་བཞིས་སྨིན་པའི་གཟུགས་ཀྱི་སྐུ།། བརྫུས་ནས་སྐྱེས་པའི་ལུས་བླངས་ཏེ།། སྟོན་པ་སངས་རྒྱས་བཅོམ་ལྡན་འདས།། ལོ
16a5 བརྒྱད་མཛེས་པའི་གཟུགས་སུ་སྤྲུལ།། གཟིགས་སྟངས་གསུམ་ལས་སྟོན་པའི་སྐུ།། སྣང་བའི་འོད་ནི་བསམ་མི་ཁྱབ།། སྤྲུལ་པ་མཛད་པ་དང་པོར་བྱུང་།། རྒྱུད་འབྱུང་གླེང་གཞི་དང་པོ་ལ།། ལྔ་པོ་རྣམས་ཀྱི་ས་བོན
16a6 འཛིན།། གདུལ་བྱ་བརྫུས་ནས་སྐྱེས་པ་ལ།། ཁ་དོག་དཀར་ཞིང་ཤ་གཟུགས་བྲལ།། ཟང་ཐལ་དྲི་མ་མེད་པའི་སྐུ།། ཉོན་མོངས་རགས་པ་རང་དག་སྟེ།། བག་ལ་ཉལ་བ་མ་ཡིན་པས།། མངོན་པར་རྒྱུ་བ
iiif viewer powered by OpenSeadragon
