| e-texts navigator |
| Wylie |
357b1 ཅན་གྱི་དབང་པོ་ལ་རྣོ་བརྟུལ་མེད་དོ།། དེ་ཅིའི་ཕྱིར་ཞེ་ན།། སྣང་བ་ལ་བསྟན་དུ་ཡོད་པའི་ཕྱིར་ཐབས་ལ་ཆེ་ཆུང་མེད་དོ།། དེ་ཅིའི་ཕྱིར་ཞེ་ན།། གདམས་ངག་བསྟན་པས་ཐམས་ཅད་གྲོལ་བའི་ཕྱིར་རོ།། སེམས་ཅན
357b2 གྱི་དབང་པོ་ལ་རྣོ་བརྟུལ་མེད་དོ།། དེ་ཅིའི་ཕྱིར་ཞེ་ན།། ངོ་སྤྲད་པས་ཆོག་པའི་ཕྱིར་རོ།། དེའི་ཕྱིར་ན།། སངས་རྒྱས་ཀྱི་ལམ་ལ་མཁས་པར་གྱིས་ཤིག། སངས་རྒྱས་ཀྱི་བདེན་པ་ཉི་ཤུ་རྩ་གཅིག་ངོ་ཤེས་པར་གྱིས
357b3 ཤིག། འབྲས་བུ་སྨིན་པའི་ཚད་ཤེས་པར་གྱིས་ཤིག། ཀྱེ་མ་རིགས་ཀྱི་བུ་སངས་རྒྱས་ཀྱི་དགོངས་པ་ལ་བར་མཚམས་མེད།། རང་གི་དེ་བཞིན་ཉིད་ལ་ཟད་ཅིང་སྟོང་པ་མེད་དོ།། བལྟ་བ་རང་བྱུང་གི་ཡེ་ཤེས
357b4 ཉིད།། གཟུང་འཛིན་གཉིས་ཀྱི་མཐའ་དང་བྲལ་བ་ཉིད་དོ།། དག་པ་ཡེ་ཤེས་ཀྱི་ཡུལ་ལ་ཡངས་དོག་གི་མཐའ་དང་བྲལ་བའོ།། དེ་རྒྱུད་དག་པར་བསྟན་པའོ།། ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ
357b5 སྩལ་པ། ཨེ་མ་ཧོ་རང་བྱུང་བདེ་བ་ཉིད།། ཕྱོགས་སུ་བལྟས་པས་གྲུབ་པ་མེད།། བདེ་བའི་ཡུལ་ལ་བདག་ཏུ་རྟོག་པ་མེད།། གསང་བའི་ཡེ་ཤེས་མཛོད་རྣམས་རབ་ཏུ་བསྟན།། ཡེ་ཤེས་ཀྱི་ནི་ཕྱོགས་འཛིན
357b6 སྤང་།། ལམ་རབ་བསམ་པ་མེད་པ་ཡི།། འདས་པའི་ལམ་ལ་ཐུག་པ་མེད།། རྒྱུད་ཀྱི་རྒྱལ་པོ་འདི་ཉིད་ལ།། བཤད་ལུགས་བསམ་གྱིས་མི་ཁྱབ་ཀྱང་། མདོར་བསྡུས་བཤད་ཀྱིས་འདི་བསྟན་ནོ།། རྒྱུ་དང་ཡེ་ཤེས
iiif viewer powered by OpenSeadragon
