| e-texts navigator |
| Wylie |
351b1 བསྟོད་པའོ།། ཞེ་གཅིག་འཁྲུལ་པའི་བརྡ་ཉིད་བསྟན།། དེ་ཉིད་ལ་ཡང་དོན་གཉིས་སྟེ།། འཛིན་པ་རང་གྲོལ་རྒྱུད་ཀྱི་བརྡ་དང་ནི།། སྣང་བ་ཡུལ་གྱི་བརྡ་ལྔ་བསྟན།། ཞེ་གཉིས་བསྟན་པའི་འཇིག་དུས་བསྟན།། དེ་ཉིད
351b2 ལ་ཡང་དོན་གཉིས་ཏེ།། རྟགས་རྣམས་འབྱུང་བར་བསྟན་པ་དང་།། བསྐལ་པའི་འབྱུང་དུས་བསྟན་པའོ།། ཞེ་གསུམ་བརྡའ་ལྔའི་སྒྲུབ་བསྒྱུར་བསྟན།། དེ་ཉིད་ལ་ཡང་དོན་གཉིས་ཏེ།། ཐམས་ཅད་བརྡའ་རུ་བསྟན་པ
351b3 དང་།། ཐམས་ཅད་བརྡའ་ལ་བསྡུས་པའོ།། དེ་བཞིན་སྒྲ་དོན་མན་ངག་རྣམས།། རབ་ཏུ་བསྡུ་བ་འདིར་གསུངས་སོ།། མཚན་མ་ལས་གྲོལ་ཡེ་ཤེས་ལས།། བསྐྱེད་དང་རྫོགས་པ་མེད་པར་གསུངས།། ཡང་དག་ལེའུའི
351b4 རྩ་བ་རྣམས།། གང་ཞིག་གནས་པར་འདོད་པ་རྣམས།། ལེའུ་འདི་ལས་བཙལ་བར་བྱའོ།། ཞེས་རིག་པ་རང་གྲོལ་ཆེན་པོའི་རྒྱུད་ལས།། ལེའུའི་རྩ་བའི་དོན་གསལ་བར་བཤད་པའི་ལེའུ་སྟེ་བདུན་པའོ།། །། དེ
351b5 ནས་བརྒྱད་པ་ལེ་ལག་གི་དོན་བསྡུས་ཏེ་བསྟན་པ། འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་དེས་འདི་སྐད་ཅེས་གསོལ་ཏོ།། ཀྱེ་ཀྱེ་བཅོམ་ལྡན་རྡོ་རྗེ་འཆང་།། ལེའུའི་རྩ་བཤད་དེ་ལྟར་ན།། བདག་ཅག་རྗེས་སུ་ཞུགས
351b6 རྣམས་ལ།། ལེའུའི་དོན་རྣམས་བཤད་དུ་གསོལ།། ཞེས་ཞུས་སོ།། དེ་ནས་བདག་ཉིད་ཆེན་པོ་དེས་བཀའ་སྩལ་པ། ཀྱེ་ཀྱེ་འཇམ་དཔལ་གཞོན་ནུར་གྱུར་པ་ཉོན།། ང་ཡིས་ལེགས་པར་བཤད་ཀྱིས་བརྟན་པར
iiif viewer powered by OpenSeadragon
