| e-texts navigator |
| Wylie |
341a1 བརྒྱད་པོ་འདི་ལྟ་སྟེ།། ཡང་དག་ངེས་པའི་གཏན་ཚིགས་དང་།། གཞན་དོན་འབྲེལ་བའི་གཏན་ཚིགས་དང་།། རང་དོན་བསྒྲུབ་པའི་གཏན་ཚིགས་དང་།། མཚན་མ་མིང་གི་གཏན་ཚིགས་དང་།། འཇུག
341a2 པ་ལམ་གྱི་གཏན་ཚིགས་དང་།། བདེན་པ་རྒྱུད་ཀྱི་གཏན་ཚིགས་དང་།། ངེས་པ་ལུང་གི་གཏན་ཚིགས་དང་།། སུན་འབྱིན་རིག་པའི་གཏན་ཚིགས་སོ།། གཏན་ཚིགས་ཆེན་པོ་རྣམ་པ་བརྒྱད།། དེ་བཞིན་ཀུན་ལ་ཤེས
341a3 པར་བྱ།། རྣལ་འབྱོར་ལམ་གྱི་གཏན་ཚིགས་རྣམས།། རིམ་ནས་རིམ་དུ་སྐྱེ་དང་འགག། ས་དང་ལམ་ལ་ཤེས་པར་བྱ།། ཆོས་ལ་འཛིན་མེད་མཚན་མའི་བློ་དང་བྲལ།། སྟོང་པ་ཡང་དག་རྙེད་པའི་དོན་དང་ཉེ།། གསང
341a4 སྔགས་སྦས་པའི་མན་ངག་རྣམས།། གཞུང་གི་ཚིག་ལས་ཤེས་པར་བྱ།། དེ་བཞིན་དོན་གྱིས་རྒྱས་པར་བསྟན།། བགྲོད་མེད་ལམ་ལ་དེ་བཞིན་གཤེགས།། དེ་ལ་སོགས་ཏེ་མཇུག་གི་དོན།། ཤིན་ཏུ་རྒྱས་པར་བསྟན
341a5 པའོ།། ཞེས་རིག་པ་རང་གྲོལ་ཆེན་པོའི་རྒྱུད་ལས།། མཇུག་དོན་རྒྱས་པར་བསྟན་པའི་ལེའུ་སྟེ་གསུམ་པའོ།། །། ཨོཾཿཧཱུཾ།། ། དེ་ནས་ཡང་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ།། ཀྱེ
341a6 བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། རྒྱུད་ཀྱི་གྲོལ་ལུགས་དེ་ལྟར་ལགས་ན། མན་ངག་གི་དོན་བཤད་ལུགས་གསུང་དུ་གསོལ།། ཞེས་ཞུས་སོ།། དེ་ནས་རྡོ་རྗེ་འཆང་ཆེན་པོ་དེས།། བཞི་པ་མན་ངག་གིས་བཤད
iiif viewer powered by OpenSeadragon
