| e-texts navigator |
| Wylie |
329a1 རྟོགས་པའི་དུས་སུ།། ཡེ་ཤེས་ལ་ཐོགས་རྡུགས་མེད་དོ།། སྣང་བ་ལ་ཆེ་ཆུང་མེད་དོ།། རིག་པ་ལ་བཟང་ངན་མེད་དོ།། སྒྲོན་མ་ལ་སྐྱེ་འགག་མེད་དོ།། སྙིང་པོ་ལ་འགྱུར་བ་མེད་དོ།། མཐའ་ལ་ཐུག་པ
329a2 མེད་དོ།། དབྱིངས་ལ་བྲི་བ་མེད་དོ།། དགོངས་པ་ལ་སྔ་ཕྱི་མེད་དོ།། ཞེས་བརྗོད་ནས་ཡང་མི་སྣང་བའི་ངང་དུ་གཤེགས་སོ།། དེ་ནས་ཡང་དེ་རྣམས་ཀྱི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་རབ
329a3 རྡོ་རྗེ་ཞེས་བྱ་བས། འདི་སྐད་ཅེས་གསོལ་ཏོ།། ཀྱེ་གསང་བའི་བདག་པོ་རྒྱུད་འདི་གང་གིས་གཟུང་དུ་རུང་བར་འགྱུར། ལུང་བསྟན་དུ་གསོལ།། ཞེས་ཞུས་སོ།། དེ་ནས་ཡང་ནམ་མཁའ་ནས་སྒྲ་འདི་སྐད་ཅེས་བརྗོད
329a4 དོ།། ཀྱེ་མ་ཡེ་ཤེས་གྲོགས་པོ་དག། གསང་སྔགས་རྒྱུད་ཆེན་རྒྱལ་པོ་འདི།། ཀུན་གྱིས་གཟུང་བར་དཀའ་བ་ཡིན།། དགའ་རབ་རྡོ་རྗེ་ཁྱོད་ཀྱིས་ཟུང་།། ཞེས་བརྗོད་ནས་ཅང་མེད་དོ།། དེ་ནས་འཁོར་རྣམས་ཀྱིས
329a5 བྱང་ཆུབ་སེམས་དཔའ་སེམས་དཔའ་ཆེན་པོ་དགའ་རབ་རྡོ་རྗེ་ལ་འདི་སྐད་ཅེས་ཞུས་སོ།། ཀྱེ་ལྷའི་བུ་དམ་པ་བདག་ཅག་རྣམས་ལ་ཐབས་དམ་པ་བསྟན་དུ་གསོལ། ཞེས་ཞུས་སོ།། དེ་ནས་དགའ་རབ་རྡོ་རྗེས
329a6 འདི་སྐད་ཅེས་གསུངས་སོ།། ཀྱེ་གྲོགས་པོ་དག་ཉོན་ཅིག། གསང་སྔགས་ཀུན་གྱི་ཡེ་ཤེས་ལ་མཁས་པར་བྱའོ།། ཡེ་ཤེས་ཀྱི་ལམ་ངོ་ཤེས་པར་བྱའོ།། བལྟ་བའི་ཡུལ་ངོ་ཤེས་པར་བྱའོ།། བསྒོམ་པའི་ཚད་ངོ་ཤེས་པར
iiif viewer powered by OpenSeadragon
