| e-texts navigator |
| Wylie |
309a1 དོན་ལ་ལུང་མེད་ཀྱང་།། མཚོན་ཕྱིར་ལུང་ལ་བརྟེན་ཏེ་བསྒྲུབ།། རིགས་པས་མི་འགྲུབ་ཤེས་རབ་དགོས།། རིག་པས་བསྒྲུབ་ན་འོག་མར་འགྱུར།། དེ་ལ་མན་ངག་ངེས་པར་དགོས།། རང་ཉིད་ལས་ཀྱང
309a2 རྒྱུ་ཉིད་ཡོད།། ཐམས་ཅད་རང་ལས་བྱུང་བའི་ཕྱིར།། དུས་གསུམ་བདེ་གཤེགས་ཐུགས་ཀྱི་དགོངས་པ་མ་ནོར་བར།། དྲིས་ལན་རྒྱས་པར་ཁྱོད་ལ་བསྟན་པའོ།། དེ་ནས་ཡང་གསང་བའི་བདག་པོ་ཕྱག་ན་རྡོ་རྗེས་འདི
309a3 སྐད་ཅེས་གསོལ་ཏོ།། ཀྱེ་ཀྱེ་སྨྲ་བའི་སེང་གེ་ཉིད།། འཇམ་དཔལ་གྱི་ཡེ་ཤེས་ལ་ཚད་གཟུང་དུ་ཡོད་དམ་མེད།། དུས་གསུམ་སངས་རྒྱས་ཐམས་ཅད་ཀྱིས།། གླུར་བླངས་གང་ལགས་བཤད་དུ་གསོལ།། ཞེས་དྲི་བ་དྲིས
309a4 སོ།། དེ་ནས་འཇམ་དཔལ་སྨྲ་བའི་སེང་གེ་གཞོན་ནུར་གྱུར་པ་དེས།། འདི་སྐད་ཅེས་དྲིས་ལན་རྒྱས་པར་གདམས་སོ།། ཀྱེ་མ་རྡོ་རྗེ་འཛིན་རྒྱལ་ཉོན།། ང་ཡི་དགོངས་པ་ཚད་མར་བསྟན།། དྲིས་པའི་ལན་ལ་ལེགས
309a5 པར་ཉོན།། འཇམ་དཔལ་ཡེ་ཤེས་ཉིད་ལ་ཚད་མེད་ཀྱང་།། མ་རྟོགས་བློ་ལ་ཚད་ཀྱིས་བསྟན་དུ་ཡོད།། དྲི་མ་གསུམ་གྱིས་རྒྱལ་བའི་སྐུ་ལ་བསྒྲིབས།། རགས་པས་སངས་རྒྱས་ཞིང་ཁམས་བསྒྲིབས།། དྲི་མ་བསལ་བས
309a6 ཡེ་ཤེས་ཟང་མར་ཤར།། དྲི་མ་གསུམ་ནི་དུག་གསུམ་ངོ་བོར་བསྟན།། དེ་ཡང་བསྟན་པ་འདི་ལྟ་སྟེ།། དྲི་མ་དག་ན་རགས་པར་བཤད།། དྲི་མས་རང་གི་ཡེ་ཤེས་བསྒྲིབས།། རགས་པས་སངས་རྒྱས་ཞིང་ཁམས
iiif viewer powered by OpenSeadragon
