| e-texts navigator |
| Wylie |
307b1 གཤེགས།། སྤྲོས་དང་བྲལ་བའི་ཆོས་ཀྱི་དབྱིངས།། ངོ་སྤྲོད་ནང་དུ་ཤེས་པར་བྱ།། དེ་ཡང་བསྟན་པ་འདི་ལྟར་ཡིན།། སྤྲད་པའི་རྒྱུ་ཉིད་རང་ལ་ཡོད།། སྤྲད་པའི་ཡུལ་ཉིད་སྣང་བ་ལྔ།། སྤྲད་པའི་རྐྱེན་ཉིད་འོད་སྣང
307b2 ལྔ།། སྤྲད་པའི་འབྲས་བུ་བདེན་པ་མཐོང་།། སྤྲད་པའི་ཡོན་ཏན་བསམ་མི་ཁྱབ།། སྣང་བ་ཡུལ་དང་གཉིས་མེད་ཤར།། བདེན་པ་དང་པོ་རབ་ཏུ་དགའ།། བདེན་གཉིས་ཚུལ་གྱི་ཡེ་ཤེས་རྒྱས།། བདེན་པ་གསུམ་ཉིད
307b3 དབྱིངས་སུ་འདུས།། བདེན་པ་བཞི་ཡི་ཚུལ་ཉིད་རྣམ་པས་སྟོང་།། བདེན་པ་ལྔ་ཉིད་མཁའ་ལ་གསལ།། བདེན་པ་དྲུག་གིས་དབྱིངས་སུ་འཁྱིལ།། བདེན་པ་བདུན་པས་གོས་པ་མེད།། བདེན་པ་བརྒྱད་པས་ཆགས་པ
307b4 མེད།། དེ་ཉིད་བདེན་པ་དགུ་དང་ལྡན།། བདེན་པ་བཅུ་ལ་མཐའ་བཞི་གསལ།། བཅུ་གཅིག་བདེན་པ་ཆོས་ལ་གྲོལ།། བདེན་པ་བཅུ་གཉིས་དྲི་མ་སྤངས།། བཅུ་གསུམ་ཡེ་ཤེས་བདེན་པ་མཐོང་།། བཅུ་བཞི་བདེན་པ
307b5 དེ་ཉིད་ཐོབ།། བདེན་པ་བཅོ་ལྔ་ཡང་དག་ཤེས།། བཅུ་དྲུག་བདེན་པས་རྟོགས་པ་ཉིད།། བཅུ་བདུན་བདེན་པས་སྐུ་ཉིད་ཐོབ།། བཅོ་བརྒྱད་བདེན་པས་དཀྱིལ་འཁོར་ཐོབ།། བདེན་པ་བཅུ་དགུས་ལྷ་ཚོགས
307b6 མཐོང་།། ཉི་ཤུའི་བདེན་པ་ཚད་དང་ལྡན།། རྩ་གཅིག་བདེན་པ་མཁའ་ལ་སྤྱོད།། དེ་ནས་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ།། ཀྱེ་ཀྱེ་སྨྲ་བའི་སེང་གེ་རིགས་པ་དང་ལྡན་པ་ཁྱོད།། འཇམ
iiif viewer powered by OpenSeadragon
